ԵՐԵՎԱՆԻ ԺԱՄԱՆԱԿՈՎ. «Ո՞վ ասաց՝ կա «Հայֆիլմ» կինոստուդիա, չկա՛». Դավիթ Սաֆարյան

«Կինեմատոգրաֆիան Հայաստանում ոչ թե թերի է, ոչ թե վատ է աշխատում, այլ որպես համակարգ գոյություն չունի։ Մենք անում ենք ֆիլմեր՝ ի հեճուկս այն պայմանների, որոնք կան»,- նման կարծիք է հայտնում կինոռեժիսոր Դավիթ Սաֆարյանը՝ Factor.am-ի «Երևանի ժամանակով» զրուցաշարի շրջանակում։

Նա շեշտում է, որ դիստրիբուցիայով զբաղվող օղակի պակաս կա․ «Պետությունը ոչ մի բան չպետք է անի, որովհետև պարզվեց, որ չի կարողանում անել․․․ «Ոսկե ծիրան» կինոփառատոնի սահմաններում արդեն կան պրոֆեսիոնալներ, որոնք կարող են ներքին դիստրիբուցիայով զբաղվել»,- նշում է մեր զրուցակիցը։

Ռեժիսորը միաժամանակ նկատում է, որ առանց պետական աջակցության՝ չի կարող արվեստի գործ ստեղծվել․ «Առևտուրը ազգային դեմք չունի․ ոչ ոք չի ասում՝ հայկական, վրացական, իտալական առևտուր, բայց ասում ենք՝ հայկական, վրացական, իտալական կինո»։

Դ․Սաֆարյանն անդրադառնում է նաև Հայաստանի ազգային կինոկենտրոնի գործունեությանը՝ շեշտելով, որ այն իրեն բոլորովին չի բավարարում․ «Համակարգ չկա․ դա օղակ է, որի միջոցով պետական ֆինանսավորումը հասնում է պրոդյուսերին, բայց դա համակարգ չէ»։

Ռեժիսորը նաև տարակուսանք է հայտնում՝ ինչպե՞ս կարելի է «Կինոյի մասին» օրենք չունենալ և կինոյի ոլորտում քայլ անել․ «Հիմա էլ մտածում են՝ գուցե մի մասնագետ դրսից գա, մեզ փրկի։ Չեմ կարծում, որ մենք չունենք կինոյի ոլորտի մասնագետներ, որոնք չկարողանան օգնել մեզ ոտքի կանգնել՝ իմանալով մեր թույլ և ուժեղ կողմերը»։

Դ․Սաֆարյանը խոսում է նաև «Հայֆիլմի» մասնավորեցման նպատակահարմարության մասին․ «Չի կարելի նորից տալ, նորից սխալվել․․․Ո՞վ ասաց՝ կա «Հայֆիլմ» կինոստուդիա․․․Չկա․․․Եկեք աչքակապությամբ չզբաղվենք»։

Աննա Բաբաջանյան