Պահանջում ենք անկախ աուդիտ, որի արդյունքները պետք է ներկայացվեն մեզ․ Նկարիչների միության անդամ

Հայաստանի Նկարիչների միությունը վերջին 20 տարիների ընթացքում ղեկավարում է նույն անձը, այս տարիների ընթացքում միությունում առաջացել են տարբեր խնդիրներ, ուստի այսօր միության անդամներով պահանջում ենք, որ դեկտեմբերի 15-ին  միության համագումարի ժամանակ ընտրվի այնպիսի մարդ, որը կկարողանա լուծել առաջացած խնդիրները, որոնք անհրաժեշտ են միության բնականոն աշխատանքը շարունակելու համար:

Այս մասին այսօր հրավիրված՝ «Նկարիչների միության անդամներին մտահոգող խնդիրներն ու ներկայացվելիք առաջարկները» թեմայով քննարկման ժամանակ ասաց Նկարիչների միության անդամ Մարթա Այվազյանը։

«Մեր միությունում վերջին տարիներին կանոնադրական փոփոխություններ են տեղի ունեցել մեզ համար շատ տարօրինակ ընթացակարգով, ուստի ցանկանում ենք,  որ մեր գործընկերները միանան մեզ և պահանջեն անկախ աուդիտ, ստուգումներ, որոնց արդյունքները կներկայացվեն միության բոլոր անդամներին»,-նշեց նա։

Քննարկման մասնակից Վահագն Գալստյանն էլ նկատեց, որ դեկտեմբերի 15-ին կայանալիք համագումարը պետք է տա կուտակված շատ խնդիրների պատասխաններ։

«Համագումարից առաջ ցանկալի է, որ միության անդամները ներկայացնեն միության նախագահի իրենց թեկնածուին, նրա նախընտրական ծրագիրը, որպեսզի համագումարի ժամանակ կարողանանք ընտրել մեզ համար 4-5 տարվա ռազմավարություն իրականացնող նախագահի»,-ասաց Գալստյանը։

Դեկտեմբերի 15-ին կայանալիք Նկարիչների միության համագումարի հետ կապված էլ միության անդամ Նազիկ Ասլանյանը նշեց, որ թեև այդ համագումարին մնացել է ընդամենը 3 օր, սակայն միության կայքում անգամ տեղադրված չէ համագումարի օրակարգը։

«Մինչդեռ այդ օրակարգում, բացի նախագահի ընտրության հարցից, կա նաև կանոնակարգում մի  շարք կետեր փոխելու անհրաժեշտություն. դրանցից մեկը վերաբերում է միության տարածքները օտարելուն և վարձակալության տալու կարգի փոփոխությանը»,-մտահոգություն հայտնեց Նազիկ Ասլանյանը։