19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
ՔՊ անդամ մարզպետներից ով կշարունակի պաշտոնավարել
Քաղաքականություն
12.12.2018 | 16:41
Ազգային ժողովի արտահերթ ընտրություններում հաղթած «Իմ քայլը» դաշինքի հիմնական ուժը՝ «Քաղաքացիական պայմանագիր» կուսակցությունը, ամեն օր արտակարգ ռեժիմով մի քանի ժամյա վարչության նիստեր է գումարում: Մեր աղբյուրի փոխանցմամբ՝ կուսակցության վարչության նիստերի օրակարգում Ազգային ժողովի ղեկավարների, հանձնաժողովի նախագահների և կառավարության կազմի հարցերն են:
Տեղեկությունը, որ ՔՊ-ն նշյալ օրակարգով՝ ամենօրյա ռեժիմով նիստեր է անում, հաստատեց նաև «Քաղաքացիական պայմանագիր» կուսակցության վարչության անդամ Լենա Նազարյանը: Վերջինս, սակայն, նիստերից այլ մանրամասներ չփոխանցեց:
ՔՊ-ի մեր մեկ այլ աղբյուր էլ փոխանցեց, որ «Քաղաքացիական պայմանագիր» կուսակցությունում որոշվել է, որ մարզպետներն Ազգային ժողով չեն գնալու: Այսինքն, այսպիսով 9 մանդատ փոխանցվելու է այլ թեկնածուների:
Լենա Նազարյանը մեր այս տեղեկությունը ևս չմեկնաբանեց: Արարատի մարզպետ, ՔՊ վարչության անդամ Գարիկ Սարգսյանը, սակայն, մեզ հետ զրույցում ասաց, որ ինքը նախընտրում է շարունակել պաշտոնավարումը, քանի որ կիսատ թողած ծրագրեր ունի: Շիրակի մարզպետ Կարեն Սարուխանյանն էլ մեզ հետ զրույցում նշեց, որ դեռ չի կողմնորոշվել՝ խորհրդարանում է ցանկանում աշխատել, թե մարզպետարանում: «Դա քաղաքական որոշման արդյունք կլինի, որտեղ որ ավելի օգտակար եղա, այդտեղ էլ կաշխատեմ: Ես աշխատելու եմ մեր շիրակցու համար»,- նշեց նա:
«Քաղաքացիական պայմանագիր» կուսակցության վարչության մեկ այլ անդամ՝ Կոտայքի մարզպետ Ռոմանոս Պետրոսյանը տեղեկացրեց, որ կուսակցությունում բուռն քննարկումներ են ընթանում, քննարկվում է, թե ով ինչ պաշտոն կարող է զբաղեցնել: Անդրադառնալով հարցին՝ լինելու է Ազգային ժողովում, թե շարունակելու է պաշտոնավարել որպես մարզպետ, Պետրոսյանն ասաց. «Այդ որոշումը վարչապետի և քաղաքական թիմի հետ ենք կայացնելու: Ես այժմ շարունակում եմ մարզպետի իմ պարտականությունները կատարել: Ես այդ առումով դեռ որոշում չեմ կայացրել: Լինելու են նոր նշանակումներ և լինելու են վերանշանակումներ»:
Նկատենք, որ ՔՊ մեր աղբյուրը փոխանցեց, որ, եթե մարզպետները մանդատից հրաժարվում են, դա դեռ չի նշանակում, որ շարունակելու են մարզեր ղեկավարել: Որոշ մարզպետներից Նիկոլ Փաշինյանը գոհ չէ: Նրանց հարցն էլ առաջիկայում է քննարկվելու:
Հայկ Վարդանյան
