Ինչո՞ւ որոշեցին կալանավորել Արմեն Գևորգյանին․ պաշտպանը մանրամասներ է հայտնում

ՀՀ նախկին փոխվարչապետ Արմեն  Գևորգյանը ներկա էր այսօրվա դատական նիստին։ Այս մասին նիստի ավարտից հետո Factor.am-ի հետ զրույցում ասաց Գևորգյանի պաշտպան Վարդգես Գևորգյանը։

«Նա ներկա էր այս նիստին և կներկայանա հաջորդ բոլոր նիստերին։ Արմեն Գևորգյանը չի խոչընդոտի քննության ընթացքին։ Նիստն այսօր ընդամենը հետաձգվեց այն պատճառով, որ պաշտպանական թիմին է միացել նոր պաշտպան՝  Էրիկ Ալեքսանյանը։ Դատարանը ժամանակ տվեց նոր պաշտպանին՝ գործի նյութերին ծանոթանալու համար։ Դատական նիստը կվերսկսվի վաղը՝ 10։30-ին»,- ասաց պաշտպանը։

Վերջինը նաև նշեց, որ Արմեն Գևորգյանին առաջադրված մեղադրանքի ծավալը մեծացվել է, ինչով պայմանավորված՝ նախաքննական մարմինն անհրաժեշտ է համարում  խափանման միջոց ընտրված չհեռանալու մասին ստորագրությունը փոխարինել կալանավորմամբ։

Հարցին՝ ի՞նչ նոր մեղադրանք է առաջադրվել Արմեն Գևորգյանին, պաշտպանը չպատասխանեց՝ նշելով միայն, որ այս պահին դա նախաքննության գաղտնիք է և մանրամասներ հայտնել չի կարող։

Հարցին՝ քրեական գործի հարուցումից հետո Արմեն Գևորգյանն արդյո՞ք առերեսվել է որևէ մեկի  հետ և նրա նկատմամբ իրականացվե՞լ է որևէ քննչական գործողություն, պաշտպանը պատասխանեց. «Մեկ անգամ առերեսում տեղի է ունեցել ամիսներ առաջ, դրանից հետո որևէ գործողություն նրա նկատմամբ չի կատարվել»։

Նշենք, որ, ինչպես տեղեկանում ենք մամուլից, Արմեն Գևորգյանին մեղադրանք է առաջարվել  սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացած եկամուտներն օրինականացնելու համար։

Աղավնի Սուքիասյան