Նրա նախաձեռնությունները ողբերգությամբ են ավարտվել․ Ղազարյանը՝ Աննա Հակոբյանի նախաձեռնած արշավի մասին․ ՏԵՍԱՆՅՈՒԹ

Ազգային ժողովի ընդդիմադիր «Ուժեղ Հայաստան» խմբակցության պատգամավոր Էդգար Ղազարյանը ընտանեկան բռնության դեմ պայքարի օրենսդրական նախաձեռնության քննարկման ժամանակ պնդեց, թե իշխանությունները բռնության դեմ պայքարը չեն կարող սահմանափակել միայն օրենքներ ընդունելով, քանի դեռ երկրում անպատիժ են մնում քաղաքական դրդապատճառներով բռնությունները։

«Եթե չի դատապարտվում քաղաքական գործչի նկատմամբ սեփական շենքի բակում իրականացված դաժան բռնությունը, եթե չի դատապարտվում բարձրաստիճան պաշտոնյայի կողմից հանրային տրանսպորտում կնոջ և երեխայի ներկայությամբ իրականացված բռնությունը, իսկ քաղաքական քարոզչության մեջ շարունակվում են ընդդիմախոսներին «ասֆալտին փռելու» և «պատերին ծեփելու» գռեհիկ արտահայտությունները, հենց դա է բռնությունը»,- ընդգծեց նա:

Պատգամավորը նաև մատնանշեց Արցախից բռնի տեղահանվածների նկատմամբ Ադրբեջանի իրականացրած բռնությունն ու բռնի տեղահանումը, որի պաշտպանությունը, ըստ նրա, ՀՀ իշխանությունները հանձն չառան։

Էդգար Ղազարյանը անդրադարձավ նաև վարչապետի տիկին Աննա Հակոբյանին՝ ներկաներին հորդորելով զգուշանալ նրա նախաձեռնություններից։ Հիշեցնենք, որ ընտանեկան բռնության օրենսդրական փոփոխությունների նախագիծը մշակվել է Աննա Հակոբյանի կողմից նախաձեռնած ընտանեկան բռնմության դեմ պայքարի արշավի շրջանակներում։

«Այս նախաձեռնության հեղինակը, ով ժամանակին «Կանայք հանուն խաղաղության» արշավն էր անում, Մեհրիբան Ալիևային Շուշի թեյ խմելու էր հրավիրում, ապա զինված ջոկատ էր ստեղծում և մարտական գործողությունների մասնակցում։ Նրա ստեղծած բոլոր նախաձեռնություններն ավարտվել են ողբերգությամբ: Զգուշացեք նաև այս նախաձեռնությունից»,- ասաց Ղազարյանը:

Մանրամասները՝ տեսանյութում։

Անի Թամրազյան