21.01.2026 | 20:12
Ֆիրմաները ներքին չաթով աշխատակիցներին ասում են՝ հունվարի 27-ն աշխատանքային է․ Գեղամ Նազարյան. ՏԵՍԱՆՅՈՒԹ
ԱՄՆ դեսպանությունը կազմակերպում է համաժողով արդարադատությունում կանանց դերի վերաբերյալ
Հասարակություն
11.12.2018 | 11:24
Այսօր ԱՄՆ գործերի ժամանակավոր հավատարմատար Ռաֆիկ Մանսուրը բացման խոսքով հանդես եկավ արդարադատության համակարգում կանանց դերին նվիրված համաժողովում, որը կազմակերպվել է ԱՄՆ դեսպանության Թմրամիջոցների դեմ պայքարի և իրավապահ համագործակցության գրասենյակի կողմից: Համաժողովը նպատակ ունի դատավորների, փաստաբանների, քննիչների և իրավապահ աշխատակիցների մասնակցությամբ քննության առնել արդարադատության համակարգին առնչվող մշակութային խոչընդոտները և դրանց հաղթահարման ուղիները:
Համաժողովում իրավական ու իրավապահ ոլորտի ամերիկյան փորձագետները կներկայացնեն ամերիկյան արդարադատության համակարգում այս մարտահրավերների հաղթահարման իրենց փորձը: Մասնակիցները կփորձեն համատեղ մշակել նոր ռազմավարություններ ուղղված Հայաստանի արդարադատության համակարգում ղեկավար պաշտոններում կանանց թվի մեծացմանը և հիմնարար փոփոխությունների կատարմանը:
«Ուրախ եմ, որ այս այստեղ կանանց կողքին տեսնում եմ նաև տղամարդկանց, քանի որ մենք էլ ենք պատասխանատու հավասար ներկայացվածության համար: Կարծում եմ բոլորս կհամաձայնենք, որ արդարադատության համակարգի ղեկավար օղակներում կանանց թվի ավելացումը թույլ կտա համակարգում ապահովել հասարակության առավել ճշգրիտ արտացոլում: Սա նշանակում է, որ մարդիկ ավելի մոտ ու կապված կլինեն արդարադատության համակարգին և ավելի մեծ կլինի վստահությունը համակարգի նկատմամբ», – ասաց ԱՄՆ գործերի ժամանակավոր հավատարմատար Ռաֆիկ Մանսուրը:
Համաժողովը կշարունակվի մինչև ուրբաթ օրը: Միացյալ Նահանգներից համաժողովին մասնակցում են ոլորտային չորս փորձագետներ. Քենթուկի նահանգի Լուիսվիլի համալսարանի Հյուսիսային ոստիկանական ինստիտուտի տնօրեն Սինթիա Շեյնը, Նյու Յորք նահանգի Գլխավոր դատախազի տեղակալ Քրիստեն Բիտետոն, Իլինոյս նահանգի Քուք կոմսության հանրային պաշտպան Ամի Կամպանելին և Լուիզիանա նահանգի Օռլեան դատական տարածաշրջանի քաղաքացիական դատավոր Բեռնադետ Դ՛Սուոզան:
