11.12.2024 | 23:30
Թուրքիան Մեծ Բրիտանիայից շահագործումից հանված Super Hercules ռազմատրանսպորտային ինքնաթիռներ կգնի
Էմանուել Մակրոնը Ֆրանսիայում արտակարգ դրություն է հայտարարել
Քաղաքականություն
11.12.2018 | 11:56
Ֆրանսիայի նախագահ Էմանուել Մակրոնը հայտարարել է երկրում արտակարգ տնտեսական և սոցիալական դրություն սահմանելու մասին: Ելիսեյան պալատի ղեկավարը նման որոշում է կայացրել «դեղին բաճկոնների» բողոքի ակցիաների ֆոնին, գրում է ՌԻԱ Նովոստին:
Մակրոնը դատապարտել է ցույցերի ընթացքում տեղ գտած բռնությունները: Նրա խոսքով՝ այդ հանցագործություններն արդարացում չունեն. ոչ մի զայրույթ չի կարող արդարացնել ոստիկանների ու ժանդարմների, շենքերի ու առևտրի կետերի վրա հարձակումները:
Նա նշել է նաև, որ ցանկանում է տեսնել այնպիսի Ֆրանսիա, որտեղ «կարելի է աշխատելով արժանապատիվ ապրել»: «Ես կառավարությանն ու խորհրդարանին խնդրում եմ անհրաժեշտ ամեն ինչ անել, որպեսզի հաջորդ տարվանից մենք կարողանանք մեր սեփական աշխատանքի շնորհիվ ավելի լավ ապրել: 2019 թվականից նվազագույն աշխատավարձն ամսական 100 եվրոյով կավելանա»,- հավելել է Մակրոնը:
Ֆրանսիայի նախագահը նաև այլ միջոցներ է առաջարկել, որոնք վարչապետը կներկայացնի խորհրդարանականներին:
Նշենք, որ նոյեմբերի կեսից Ֆրանսիայում «դեղին բաճկոնները» լայնածավալ բողոքի ակցիաներ են անցկացնում: Ցուցարարներն ի սկզբանե հանդես էին գալիս վառելիքի գների բարձրացման դեմ, իսկ հետո սկսեցին դժգոհություն հայտնել երկրում տիրող սոցիալական իրավիճակի կապակցությամբ:
Զանգվածային բողոքի ակցիաներն ուղեկցվում են ոստիկանների հետ բախումներով, մեքենաներ այրելով, բանկեր և խանութներ վնասելով: Ցույցերի մեկնարկից ի վեր իրավապահներն ավելի քան 4.500 մարդու են ձերբակալել:
