Նոր խորհրդարանը վարչապետ չի ընտրի. ինչպես է ձեւավորվելու նոր կառավարությունը

ԿԸՀ-ն արդեն ամփոփել է դեկտեմբերի 9-ի խորհրդարանական ընտրությունների նախնական արդյունքերը:

Նախնական տվյալների համաձայն՝ 7-րդ գումարման խորհրդարանում կլինեն «Իմ քայլը» դաշինքը՝ 70 տոկոս քվեով, «Բարգավաճ Հայաստան» կուսակցությունը՝ 8,27 տոկոս քվեով եւ «Լուսովոր Հայաստան» կուսակցությունը՝ 6,37 տոկոս քվեով: 7-րդ գումարման Ազգային ժողովի ձեւավորումից հետո խորհրդարանը վարչապետ չի ընտրելու:

Խորհրդարանի ձեւավորումից անմիջապես հետ մեծամասնության առաջարկած թեկնածուին ՀՀ նախագահը նշանակում է վարչապետի պաշտոնում: Այս ընթացակարգը կարգավորվում է ՀՀ սահմանադրության 149 հոդվածի առաջին մասով: «Հանրապետության նախագահը նորընտիր Ազգային ժողովի լիազորությունների ժամկետն սկսվելուց անմիջապես հետո անհապաղ վարչապետ է նշանակում Սահմանադրության 89-րդ հոդվածով սահմանված կարգով ձեւավորված խորհրդարանական մեծամասնության ներկայացրած թեկնածուին:

Ազգային ժողովի ձեւավորումից հետո վարչապետի ընտրություն եւ քվեարկություն տեղի չի ունենում: Քվեարկությունն ու ընտրությունը տեղի են ունենում այն ժամանակ, երբ վարչապետը հրաժարական է տալիս»,- այս մասին մեզ հետ զրույցում ասաց ԱԺ աշխատակազմի ղեկավարի տեղակալ Արսեն Բաբայանը: Նշենք, որ վարչապետի ընտրությունից հետո Սահմանադրության համաձայն՝ կառավարությունը ձեւավորվում է 15 օր անց:

Գործադիր մարմնի կազմավորումից քսան օր անց էլ վարչապետն Ազգային ժողով է ներկայացնում կառավարության ծրագիրը: Խորհրդարանը կառավարության ծրագրին կարող է հավանություն տալ կամ չտալ յոթ օրվա ընթցաքում: Հայկ Վարդանյան