Զելենսկին՝ Թրամփին․ «Ավելի քիչ դժվա՞ր է Պուտինի հետ»

Ուկրաինայի նախագահ Վլադիմիր Զելենսկին հայտարարում է, որ իրեն զարմացնում են բոլոր նրանք, ովքեր հավատում են, որ Ռուսաստանը պատրաստ կլինի դադարեցնել պատերազմը տարածքային զիջումների դեպքում։

«Պուտինն ասում է, թե ուզում է Դոնբասը, բայց ինչո՞ւ սկսեց լայնածավալ ներխուժումը՝ Կիևի գրեթե օկուպացիայով։ Արդյո՞ք դա մեր երկրի արևելքում է, արդյո՞ք դա Դոնբասում է։ Ո՛չ, դա մայրաքաղաքն է։ Եվ պետությունը գոյություն չունի առանց մայրաքաղաքի։ Նա ուզում է ոչնչացնել մեզ»,- Բրյուսելում լրագրողների հետ հանդիպմանը հայտարարեց Զելենսկին։

Նրա խոսքով՝ Ռուսաստանի նախագահ Վլադիմիր Պուտինը չի հարգում Ուկրաինայի ինքնիշխանությունն ու տարածքային ամբողջականությունը և ուկրաինացիներին առանձին ազգ չի համարում։

«Այնպես որ՝ դուք իսկապե՞ս հավատում եք, որ նրան պետք է մեր երկրի արևելյան մասը։ Իհարկե, բավարար չէ։ Եվ ի՞նչ կլինի, եթե մենք ընկնենք…»,- հռետորական հարցեր հնչեցրեց նա։

Զելենսկիի գնահատմամբ՝ քանի դեռ Ուկրաինան դիմադրում է, Եվրոպան Ռուսաստանի հետ ավելի լայն առճակատման քիչ վտանգի է ենթարկվում։

Եվրոպական մի շարք երկրներում անօդաչու սարքերի հետ կապված միջադեպերն Ուկրաինայի նախագահը բնորոշեց որպես Ռուսաստանի կողմից Եվրոպայի արձագանքը փորձարկելու փորձեր։ Նրա խոսքով՝ առանձին անօդաչու սարքերի հետ կապված միջադեպերը պետք է դիտարկել հնարավոր ավելի մեծ սպառնալիքների համատեքստում։

Starlink-ի արագության սահմանափակման հետևանքները

Ուկրաինայի նախագահը հերքում է պնդումները, թե Կիևը Starlink արբանյակային կապի համակարգն օգտագործում է Ռուսաստանի տարածքում խորը հարվածների համար։

«Մենք չենք օգտագործում Starlink-ը Ռուսաստանի տարածքում գտնվող թիրախներին հարձակվելու կամ պատասխանելու համար»,- հայտարարեց Զելենսկին՝ հավելելով, որ համակարգը կիրառվում է քաղաքացիական ենթակառուցվածքները պաշտպանող՝ բարձր արագությամբ շարժվող ընդհատիչ անօդաչու սարքերի աշխատանքն ապահովելու նպատակով։

Ըստ նրա՝ Starlink-ի արագության սահմանափակումները զգալիորեն դժվարացրել էին ավելի քան 400 կմ/ժ արագությամբ շարժվող թշնամական թռչող սարքերի չեզոքացումը, ինչպես նաև վտանգել էին մարտական գոտիներում գտնվող քաղաքացիական անձանց սնունդ և ջուր հասցնելու լոգիստիկան։

Իլոն Մասկին պատկանող ամերիկյան SpaceX ընկերությունը հոկտեմբերի լույս 14-ի գիշերը սահմանափակել էր Ուկրաինայում Starlink տերմինալների աշխատանքի արագությունը։ Ուկրաինան դիմել է SpaceX-ին և Սպիտակ տանը՝ անհրաժեշտ հնարավորությունն ապահովելու խնդրանքով։

«Մենք երախտապարտ ենք, եթե նրանք վերականգնել են նախկին արագությունը»,- ասաց Զելենսկին՝ այդպես էլ չհաստատելով, որ նախկին հնարավորություններն ամբողջությամբ վերականգնվել են։

Ո՞ւմ հետ է ավելի դժվար

Վլադիմիր Զելենսկին անդրադարձավ ԱՄՆ նախագահ Դոնալդ Թրամփի հայտարարությանը, թե Ուկրաինայի ղեկավարի հետ «ավելի դժվար է գործ ունենալ, քան Պուտինի»։

«Կարո՞ղ եք պատկերացնել՝ նախօրեին հազար անօդաչու սարք է ներխուժել Ուկրաինա։ Հազար։ Բայց ամերիկյան կողմն ասել է, որ դժվար է խոսել Զելենսկիի հետ։ Ավելի քիչ դժվա՞ր է Պուտինի հետ… Ո՛չ, իհարկե»,- ասաց նա։

Ասուլիսի ավարտին Sky News-ի լրագրողը հարցրեց՝ արդյո՞ք Վլադիմիր Զելենսկին զգում է, որ ԱՄՆ նախագահ Դոնալդ Թրամփը, ներքաղաքական և արտաքին քաղաքական խնդիրների ձախողումների պատճառով, իրեն դարձնում է «քավության նոխազ»։

Զելենսկին հարցին արձագանքեց ժեստով ու ժպիտով․ «Սա է իմ պատասխանը»։

Կարինե Ասատրյան

Բրյուսել