«Ինքս էլ չգիտեմ՝ իմ մուտքն էլ կարգելվի՞ Ռուսաստան». Ալխաս Ղազարյանը՝ Սանկտ Պետերբուրգ նախատեսված գործուղման մասին

Ազգային ժողովի պատգամավոր Ալխաս Ղազարյանը Factor.am-ի հետ զրույցում անդրադարձել է Սանկտ Պետերբուրգ նախատեսված գործուղմանը և Ռուսաստանի Դաշնություն իր մուտքի հնարավոր արգելքի վերաբերյալ մտահոգություններին։

Ազգային ժողովի նախագահի տեղակալ Ռուբեն Ռուբինյանի հոկտեմբերի 13-ի կարգադրության համաձայն՝ ԱՊՀ միջխորհրդարանական վեհաժողովի մշտական հանձնաժողովների նիստերին մասնակցելու նպատակով 2026 թվականի հոկտեմբերի 21-24-ը Սանկտ Պետերբուրգ են գործուղվում ԱԺ պատգամավորներ Մամիկոն Ասլանյանը և Ալխաս Ղազարյանը (հոկտեմբերի 22-24-ը)։

Անդրադառնալով հարցին՝ մտահոգություն չունի՞, որ պատգամավոր Լուսինե Բադալյանի օրինակով իր մուտքը նույնպես կարող է արգելվել ՌԴ, Ալխաս Ղազարյանը նշեց, որ դեռևս հստակ տեղեկատվություն չկա։

«Խնդիրն այն է, որ ինքս էլ չգիտեմ, ճիշտն ասած, ինչ մեթոդով են ում արգելել կամ ինչն են հաշվի առել․․․ Այնուամենայնիվ, կտեսնենք, երբ այդ օրերը հասնեն՝ արդյո՞ք ինձ էլ են արգելել։ Հստակ պատասխան չունեմ»,- ասաց պատգամավորը։

Ղազարյանի խոսքով՝ թեև նշվում է, որ մուտքի արգելքի պատճառը «հակառուսական հայտարարություններն» են, սակայն որևէ կոնկրետ հիմնավորում կամ հայտարարություն նշված չէ, և որևէ մեկը հստակ չգիտի արգելքի բուն պատճառը։

Հիշեցնենք՝ հոկտեմբերի 14-ին «Քաղաքացիական պայմանագիր» խմբակցության պատգամավոր Լուսինե Բադալյանը հայտնել էր, որ իրեն թույլ չեն տվել մուտք գործել Ռուսաստանի Դաշնություն։

ԱԺ պատգամավորը նախատեսում էր մեկնել Սանկտ Պետերբուրգ՝ հոկտեմբերի 15-ին կայանալիք ԱՊՀ միջխորհրդարանական վեհաժողովի (ՄԽՎ) սոցիալական քաղաքականության և մարդու իրավունքների մշտական հանձնաժողովի հերթական նիստին մասնակցելու նպատակով։

«Տարօրինակ և մտահոգիչ իրավիճակ է, երբ ազգային խորհրդարանական պատվիրակության անդամին թույլ չեն տալիս մեկնել միջազգային խորհրդարանական կազմակերպության կենտրոնակայան՝ իր պաշտոնական պարտականությունները կատարելու և հանձնաժողովի աշխատանքներին մասնակցելու համար»,- նշել էր Բադալյանը։

Թե ինչու է արգելվել Լուսինե Բադալյանի մուտքը Ռուսաստան, այս պահին հայտնի չէ: Նման մի դեպքի մասին էլ մարտի 25-ին էր հայտնի դարձել, երբ ՔՊ պատգամավոր Մարինա Ղազարյանը հայտարարել էր, որ ռուսական ավիաընկերությունը չեղարկել է իր տոմսերը, երբ նա դիվանագիտական անձնագրով պետք է մեկներ Աշխաբադ՝ միջխորհրդարանական երկխոսությանը մասնակցելու նպատակով։

Եվգենյա Համբարձումյան