Զելենսկին այն մարդը չէ, որի հետ մենք պետք է գործ ունենանք․ Թրամփ

ԱՄՆ նախագահ Դոնալդ Թրամփը հայտարարել է, որ Ուկրաինայի նախագահ Վլադիմիր Զելենսկին «այն մարդը չէ», որի հետ ԱՄՆ-ը պետք է գործ ունենա, քանի որ, նրա պնդմամբ, Զելենսկին չի ցանկանում բանակցել պատերազմի դադարեցման շուրջ։ Европейская правдa-ի հաղորդմամբ՝ նա այդ մասին ասել է Newsmax-ին տված հարցազրույցում։

ԱՄՆ նախագահի այս մեկնաբանությունները Զելենսկիի հասցեին հնչեցրած քննադատական հայտարարությունների շարքի շարունակությունն են։ Մասնավորապես, Թրամփը հայտարարել էր, որ «Ուկրաինայի համար ժամանակն է նոր առաջնորդ ընտրել»։

«Նա (Զելենսկին) այն մարդը չէ, որի հետ մենք պետք է գործ ունենանք։ Բայդենը նրան հարյուր միլիարդավոր դոլարներ է տվել՝ միլիարդներ ու միլիարդներ։ Կարծում եմ՝ նրանք (Ուկրաինան և Ռուսաստանը), ի վերջո, ինչ-որ համաձայնության կգան։ Բայց ոչ նրա հետ։ Նա չի ցանկանում պայմանավորվել։ Նա ասում է, թե ցանկանում է համաձայնության գալ, բայց իրականում չի ցանկանում»,- հայտարարել է Թրամփը։

ԱՄՆ նախագահը հավելել է, որ «Զելենսկիի մեծ աջակիցը չէ», և նշել, որ «նրանք ավերել են այդ երկիրը»։

«Իրականում ամեն ինչ սկսվել է Բարաք Օբամայից, երբ նրանք ստիպեցին հանձնել Ղրիմը։ Ղրիմը, անկասկած, Ուկրաինայի ամենաարժեքավոր մասն է։ Այն չորս կողմից շրջապատված է օվկիանոսով, այնպես չէ՞։ Երկրի ամենագեղեցիկ անկյունն է։ Ես լավ հողատարածքներից գլուխ եմ հանում։ Նրանք հանձնեցին Ղրիմը, բայց ինչ վերաբերում է վերջին իրադարձություններին, ամեն ինչ սկսվեց այն ժամանակ, երբ Զելենսկին մեկնեց Պուտինի հետ հանդիպման, և նրանց հանդիպումը շատ վատ անցավ»,- հայտարարել է Թրամփը։

Նա նշել է, որ Պուտինն ատում է Զելենսկիին, իսկ Զելենսկին՝ Պուտինին, և «երբ մարդկանց միջև նման ատելություն է տիրում, շատ դժվար է համաձայնության հասնել»։ Միաժամանակ, Թրամփը համոզված է, որ պատերազմը «պետք է շուտով ավարտվի», քանի որ «իրականում երկու կողմերն էլ կցանկանային, որ այն ավարտվեր»։

«Սակայն, իմ կարծիքով, Զելենսկիի հետ գործ ունենալն ավելի դժվար է, քան Պուտինի»,- հավելել է ԱՄՆ նախագահը։

Բացի այդ, Թրամփն Ուկրաինայի կողմից ռուսական նավթավերամշակման գործարաններին նnր հարվածները որակել է «ամոթալի»՝ հավելելով, որ դրանք հանգեցնում են էներգակիրների համաշխարհային գների բարձրացմանը։

Թարգմանությունը՝ Էմմա Չոբանյանի