02.10.2026 | 20:15
Ինչպես և որտեղ են չեզոքացնել ադրբեջանցի զինվորին․ ականատեսները մանրամասներ են պատմում․ ՏԵՍԱՆՅՈւԹ
ՌԴ-ն սպասում է Հայաստանի արձագանքին՝ երկաթուղու երկու հատվածների վերականգնման վերաբերյալ. Օվերչուկ
Քաղաքականություն
02.10.2026 | 19:20
Ռուսաստանը սպասում է Հայաստանի երկաթուղու երկու հատվածների վերականգնման վերաբերյալ առաջարկին Երևանի արձագանքին, որոնք կապված են Ադրբեջանի և Թուրքիայի հետ։ Այս մասին լրագրողներին հայտնել է ՌԴ փոխվարչապետ Ալեքսեյ Օվերչուկը՝ պատասխանելով ՏԱՍՍ-ի հարցին։
«Այսօր քննարկվել է նաև Հայաստանի երկաթուղու երկու փոքր հատվածների վերականգնման հարցը, որոնք գտնվում են «Ռուսական երկաթուղիներ» ընկերության կոնցեսիոն կառավարման ներքո։ Մենք ուշադրություն ենք հրավիրել այն հանգամանքին, որ աջակցում ենք այդ երկու հատվածների վերականգնմանը և պատրաստ ենք մասնակցել ու աջակցել Հայաստանին, մասնավորապես, Երասխից մինչև Նախիջևան և Գյումրիից մինչև Թուրքիայի սահման տրանսպորտային կապն ապահովելու նպատակով»,- ասել է նա։
Օվերչուկը հիշեցրել է, որ այդ որոշումները ՌԴ նախագահի մակարդակով ընդունվել էին դեռևս հունվարին։
«Եվ մենք սպասում ենք, թե հայկական կողմն ինչպես կարձագանքի դրան։ Կարծում եմ՝ առաջիկայում պետք է տեղի ունենան շատ կարևոր հանդիպումներ, որոնք այս հարցն առաջ կմղեն»,- նշել է նա՝ հավելելով՝ «գնդակը նրանց դաշտում է»։
Օվերչուկը նաև ընդգծել է, որ Ռուսաստանը միշտ աջակցել է տրանսպորտային կապերի ամրապնդման և Հարավային Կովկասում տրանսպորտային հաղորդակցությունների ապաշրջափակման նախագծերին։
Նշենք, որ 2025 թվականի դեկտեմբերին ՀՀ վարչապետ Նիկոլ Փաշինյանը դիմել էր ռուսական կողմին՝ Ադրբեջանի և Թուրքիայի սահմաններ տանող երկաթուղու հատվածները հնարավորինս արագ վերականգնելու համար։
Թարգմանությունը՝ Էմմա Չոբանյանի
