Լրահոսը բացում ես` «ռեժիմը խուճապի մեջ է», բայց մարդիկ խորապես հավատում են խաղաղությանը. Փաշինյան․ ՏԵՍԱՆՅՈՒԹ

Տնտեսական ակտիվությունը, շինարարության ծավալներն ու անշարժ գույքի շուկայի աճը վկայում են այն մասին, որ Հայաստանի քաղաքացիները խորապես հավատում են խաղաղությանը՝ ի հեճուկս լրահոսում տիրող տագնապային ու խուճապային տրամադրությունների։ Այս մասին Կառավարության նիստում հայտարարեց վարչապետ Նիկոլ Փաշինյանը։

«Հիմա, օրինակ, որ բացենք լրահոսը և սկսենք կարդալ, ասում ես՝ ինչ-որ տենց խուճապ է։ Ոչ միայն ռեժիմն է խուճապի մեջ, այլև ռեժիմին հարակից, հակառակ՝ բոլորն անընդհատ և ամեն օր խուճապի մեջ են։ Բայց խնդիրն այն է, որ տնտեսական այս ցուցանիշները մի բանի մասին են վկայում՝ մարդիկ խորապես հավատում են խաղաղությանը»,- նշեց Փաշինյանը։

Վարչապետի խոսքով՝ այս իրավիճակից բխում է հստակ քաղաքական հետևություն. կառավարությունը պարտավոր է քաղաքացիների սպասումները հասցնել տրամաբանական ավարտին․ «Այս փուլում խաղաղություն կա, խաղաղությունն առկա է, իրականություն է, բայց խաղաղությունը մինչև վերջ ինստիտուցիոնալացված չէ։ Կառավարության մեծագույն խնդիրն է մարդկանց սպասումը տանել մինչև վերջ և տեղ հասցնել»։

Փաշինյանն ընդգծեց, որ ենթակառուցվածքային բոլոր ծրագրերին, սահմանազատման գործընթացին, «Հյուսիս-հարավ» մայրուղու կառուցմանը, «Խաղաղության խաչմերուկ» նախաձեռնությանը և հաղորդակցությունների ապաշրջափակմանը զուգահեռ՝ թիվ մեկ հիմնարար քայլը մնում է խաղաղության պայմանագրի կնքումը։

«Մենք պետք է շատ հստակ ձևակերպենք մեր խնդիրը՝ խաղաղության համաձայնագրի ստորագրումը և վավերացումը։ Մենք այդ սպասումն առաջացրել ենք, մարդիկ արձագանքել են, հավատացել են դրան։ Հիմա քաղաքացիները պետք է տեսնեն, որ մենք իրենց սպասումը որպես քաղաքական կապիտալ վերցնում ենք և հասցնում մինչև վերջ՝ այնքան, մինչև այդ թեման ընդհանրապես, որպես այդպիսին, դուրս գա օրակարգից։ Եվ սա պետք է լինի մեր գլխավոր ռազմավարական առաջնահերթությունը»,- ասաց գործադիրի ղեկավարը։