Թբիլիսիում Հեյդար Ալիևի կիսանդրին վնասելու գործով ՀՀ քաղաքացի է ձերբակալվել

Թբիլիսիում Հայաստանի քաղաքացի է ձերբակալվել՝ Ադրբեջանի նախկին նախագահ Հեյդար Ալիևի կիսանդրին վնասելու գործով, գրում է Ազատություն ռադիոկայանի վրացական ծառայությունը։

Կիսանդրու վանդալիզմի մասին տեղեկատվությունը նախ տարածվել է սոցիալական ցանցերում։ Վրաստանում Ադրբեջանի դեսպան Ֆաիգ Գուլիևը հայտնել է, որ միջադեպը տեղի է ունեցել սեպտեմբերի 21-ի առավոտյան ժամերին, ենթադրյալ հանցագործը ձերբակալվել է, իսկ Ներքին գործերի նախարարությունը, Պետական ​​անվտանգության ծառայությունը և այլ համապատասխան մարմիններ շարունակում են քննչական և դատավարական գործողությունները։ Դեսպանը ձեռնպահ է մնացել գործի լրացուցիչ մանրամասները քննարկելուց՝ նշելով, որ քննությունը դեռևս չի ավարտվել։

Ներքին գործերի նախարարությունը հաստատել է, որ Ալիևի կիսանդրու վնասման գործով ձերբակալվել է օտարերկրյա քաղաքացի։

Հետաքննությունը շարունակվում է Քրեական օրենսգրքի 187-րդ հոդվածի 1-ին մասով, որը վերաբերում է ուրիշի գույքի վնասմանը կամ ոչնչացմանը՝ զգալի վնաս պատճառելով։ Օրենքի այս հոդվածը նախատեսում է տուգանք, հասարակական աշխատանք կամ ուղղիչ աշխատանքներ, տնային կալանք կամ ազատազրկում՝ մեկից հինգ տարի ժամկետով։

Ձերբակալվածի հանրային պաշտպանի խոսքով՝ իր պաշտպանյալն այժմ օգտվում է լռելու իրավունքից։ Նշվում է, որ ձերբակալվածը 40 տարեկան տղամարդ է։

«Նա Վրաստանի հետ սերտ շփում չի ունեցել, եկել է որպես զբոսաշրջիկ»,- ասել է  Թեոնա Փերաձեն։

Գործով նախնական լսումները տեղի կունենան նոյեմբերի 12-ին։

Թարգմանությունը՝ Էմմա Չոբանյանի