ԱՄՆ-ը պաշտոնապես հայտարարել է Իրաքում «Անսասան վճռականություն» գործողության ավարտի և զորքերի դուրսբերման մասին

Միացյալ Նահանգները և դաշնակից երկրները սեպտեմբերի 30-ին հայտարարել են Իրաքում 12 տարի տևած «Անսասան վճռականություն» (Operation Inherent Resolve) գործողության ավարտի մասին։ Պաշտոնական հայտարարությունը հրապարակվել է Պենտագոնը, փոխանցում է The Insider-ը։

Հայտարարությունը հաջորդել է կոալիցիայի անձնակազմի և տեխնիկայի դուրսբերմանը Էրբիլի ավիաբազայից։ Հաղորդագրության մեջ այս քայլը ներկայացվում է որպես «ԻԼԻՊ-ին ջախջախելու ռազմական առաքելության հաջող ավարտ»։

«Այս հանգրվանն արտացոլում է 12 տարի տևած արշավի հաջողությունը, որի նպատակն էր Իրաքում և ամբողջ տարածաշրջանում զինյալներին որպես կազմակերպված ռազմական սպառնալիք ջախջախելը։ Այն նաև նշանավորում է պատերազմական պայմաններում կոալիցիոն առաքելությունից անցումը Իրաքի կողմից ղեկավարվող անվտանգության ապահովման ջանքերին, որոնք աջակցվում են անվտանգության ոլորտում ավելի սովորական երկկողմ հարաբերություններով»,- ասվում է հայտարարությունում։

Այն մասին, որ առաքելությունը կավարտվի սեպտեմբերի 30-ին, հայտարարվել էր այս տարվա ամռանը։ Դեռևս 2024 թվականին ԱՄՆ-ն ու Իրաքը համաձայնեցրել էին դրա երկփուլ ավարտը։ Սկզբում նախատեսվում էր, որ անմիջականորեն Իրաքում իրականացվող ռազմական առաքելությունը կավարտվի մինչև 2025 թվականի սեպտեմբերը, սակայն ԻԼՊԻ-ի դեմ Սիրիայում իրականացվող գործողություններին աջակցելու համար Իրաքի տարածքի օգտագործումը նախատեսվում էր մինչև 2026 թվականի սեպտեմբերը։ Այս տարվա հուլիսին Վաշինգտոնն ու Բաղդադը հաստատել էին սեպտեմբերի 30-ը՝ որպես Իրաքում Operation Inherent Resolve-ի ավարտի վերջնական ժամկետ։

Այս գործողությունը մեկնարկել էր 2014 թվականի օգոստոսին՝ այն բանից հետո, երբ ԻԼԻՊ-ը գրավել էր Իրաքի և Սիրիայի զգալի տարածքներ։ ԱՄՆ-ն ու նրա դաշնակիցները, որոնց թվում էին Մեծ Բրիտանիան, Կանադան, Ֆրանսիան և այլ երկրներ, ավիահարվածներ էին հասցնում խմբավորման դիրքերին և ուսուցանում էին իրաքյան ուժերին։

Իրաքում ԻԼԻՊ-ի տարածքային «խալիֆայությունը» վերացվել էր 2017 թվականի վերջին, սակայն միջազգային կոալիցիան շարունակել է գործողությունները խմբավորման մնացած բջիջների դեմ։ Այս տարվա գարնանը մնացած ամերիկացի զինծառայողները հիմնականում տեղակայված էին Իրաքյան Քուրդիստանում։

Թարգմանությունը՝ Էմմա Չոբանյանի