Ռուսական զորքերը հարվածել են Կիևին ու Կիևի մարզին․ զոհեր կան, այդ թվում՝ երեխա

Ռուսաստանի զինված ուժերը սեպտեմբերի լույս 30-ի գիշերը կրկին հրթիռներով և անօդաչու թռչող սարքերով հարձակվել են Կիևի ու Կիևի մարզի վրա, փոխանցում է Current time-ը։

Կիևի մարզի Վիշգորոդի շրջանում հարձակման հետևանքով ավերվել է մասնավոր բնակելի տուն, զոհվել է երեխա։ Մարզային ռազմական վարչակազմի ղեկավար Տիմուր Տկաչենկոն հայտնել է, որ տանը գտնվող ևս մեկ երեխա ու երկու մեծահասակ վիրավորվել են։ Նույն շրջանում վնասվել և ավերվել են նաև այլ մասնավոր տներ։

Բուչայի շրջանում վնասվել է երեք մասնավոր տուն, 11 ավտոմեքենա ու երկու պահեստային տարածք։ Բացի այդ, Տկաչենկոյի խոսքով՝ Բուչայի, Վիշգորոդի և Օբուխովի շրջաններում «արձանագրվել են ենթակառուցվածքային օբյեկտների վրա հարձակման հետևանքներ»։

Կիևում զոհվել է երկու մարդ, ևս չորսը վիրավորվել է, հայտնել է Ուկրաինայի արտակարգ իրավիճակների պետական ծառայությունը։ Գերատեսչության տվյալներով՝ վնասվել է մոտ 10 տուն։ Պոդոլսկի շրջանում հրդեհվել են ոչ բնակելի շենքի տանիքը, վեցերորդ հարկում գտնվող շինանյութերը, ինչպես նաև պահեստային տարածք։ Գոլոսեևսկի շրջանում հրդեհվել են բաղնիք և կենցաղային շինություն։

Ուկրաինայի ռազմաօդային ուժերի տվյալներով՝ Ռուսաստանը հարձակվել է Ուկրաինայի վրա հականավային և բալիստիկ հրթիռներով, ինչպես նաև 188  հարվածային  անօդաչու թռչող սարքերով։ Տեղի ժամանակով առավոտյան ժամը 8:00-ի դրությամբ ուկրաինական ուժերը խոցել  էին հինգ բալիստիկ հրթիռ և 155 ԱԹՍ։

Թարգմանությունը՝ Էմմա Չոբանյանի