Հայտնի է՝ նոյեմբերի 29-ին որ համայնքներում ՏԻՄ ընտրություններ կանցկացվեն

Կենտրոնական ընտրական հանձնաժողովը հրապարակել է այն համայնքների ցանկը, որտեղ նոյեմբերի 29-ին կայանալու են տեղական ինքնակառավարման մարմինների ընտրություններ։

Նոյեմբերի 29-ին՝ ժամը 08:00-ից մինչև 20:00-ն, ավագանու ընտրություններ կանցկացվեն 11 համայնքում՝ համամասնական ընտրակարգով։

Ընտրություններ կանցկացվեն՝

Արագածոտնի մարզի Աշտարակ և Ապարան համայնքներում,
Արմավիրի մարզի Մեծամոր և Բաղրամյան համայնքներում,
Գեղարքունիքի մարզի Սևան համայնքում,
Լոռու մարզի Սպիտակ համայնքում,
Շիրակի մարզի Աշոցք և Ամասիա համայնքներում,
Սյունիքի մարզի Կապան համայնքում,
Տավուշի մարզի Նոյեմբերյան համայնքում։

Այս համայնքներում ընտրողները քվեարկելու են կուսակցությունների կամ կուսակցությունների դաշինքների ընտրական ցուցակների օգտին։

Կուսակցություններն ու կուսակցությունների դաշինքները ընտրական ցուցակների գրանցման համար անհրաժեշտ փաստաթղթերը կարող են ներկայացնել հոկտեմբերի 15-ից մինչև հոկտեմբերի 25-ը՝ ժամը 18:00-ը։ Ցուցակների գրանցումը կանցկացվի հոկտեմբերի 25-ից մինչև հոկտեմբերի 30-ը՝ ժամը 18:00-ը։

Նոյեմբերի 29-ին ընտրություններ կանցկացվեն նաև Արագածոտնի մարզի Արևուտ և Մեծաձոր համայնքներում։ Այստեղ, սակայն, ընտրությունները կանցկացվեն մեծամասնական ընտրակարգով՝ ընտրողները քվեարկելու են համայնքի ղեկավարի և ավագանու անդամների թեկնածուների օգտին։

Այս համայնքներում թեկնածուների գրանցման համար անհրաժեշտ փաստաթղթերը կարող են ներկայացվել հոկտեմբերի 25-ից մինչև հոկտեմբերի 30-ը՝ ժամը 18:00-ը։ Թեկնածուների գրանցումը կանցկացվի հոկտեմբերի 30-ից մինչև նոյեմբերի 4-ը՝ ժամը 18:00-ը։

Ընտրողների ցուցակներում անճշտությունները շտկելու համար դիմումներ կարելի է ներկայացնել մինչև նոյեմբերի 17-ը՝ ՆԳՆ Միգրացիայի և քաղաքացիության ծառայություն կամ համապատասխան տարածքային անձնագրային ծառայություն։
Ընտրողները իրենց ընտրական տեղամասի համարի և հասցեի մասին տեղեկատվությունը կկարողանան ստանալ հոկտեմբերի 20-ից՝ ՆԳՆ և ԿԸՀ կայքերից։ Նույն ժամանակից հասանելի կլինի նաև տեղամասերի վերաբերյալ տեղեկատվությունը տեղաշարժման դժվարություններ ունեցող ընտրողների համար։

Անի Թամրազյան