18.10.2026 | 20:17
«Մեր նպատակը նոր խոստումներ տալը չէ, այլ ստանձնած պարտավորությունները կատարելը»․ Մաթևոսյան․ ՏԵՍԱՆՅՈւԹ
Վաշինգտոնում քննարկվել են թուրք-ամերիկյան հարաբերությունները
Քաղաքականություն
08.12.2018 | 17:30
ԱՄՆ-ի մայրաքաղաք Վաշինգտոնում գործող «Թուրքական ժառանգություն հիմնադրամը» քննարկումներ է կազմակերպել թուրք-ամերիկյան հարաբերությունների ներկա վիճակի և հեռանկարների վերաբերյալ։
«2019թ. ԱՄՆ-Թուրքիա անվտանգության համագործակցություն» խորագիրը կրող քննարկումներին Թուրքիայից մասնակցել է պաշտոնաթող գեներալ-մայոր Նաիմ Բաբուրօղլուն, իսկ ԱՄՆ-ից՝ պաշտոնաթող գեներալ-լեյտենանտ Դանիել Քրիսմանը և անվտանգության մասնագետ Դով Զաքեյիմը։
Քննարկումների ընթացքում հնչել է այն տեսակետը, որ այս տարվա պես 2019-ին ևս թուրք-ամերիկյան հարաբերություններում դժվարություններ են լինելու։
Բաբուրօղլուն նշել է, որ ԱՄՆ-ն չի աջակցելու Եփրատի արևելքում Թուրքիայի գործողություններին։ Ըստ թուրք պաշտոնաթող գեներալի՝ «Քուրդիստանի բանվորական կուսակցության» (ՔԲԿ-PKK), Սիրիայի քրդական «Ժողովրդավարական միություն կուսակցության» (ԺՄԿ-PYD) ռազմական թև հանդիսացող «Ժողովրդական ինքնապաշտպանական ջոկատներ»-ի (ԺԻՋ-YPG), ինչպես նաև S-400 հրթիռների պատճառով 2019 թ.-ին թուրք-ամերիկյան հարաբերություններում լարվածությունը պահպանվելու է։
Նա կոչ է արել ԱՄՆ-ին աջակցություն չցուցաբերել քրդական «Ժողովրդական ինքնապաշտպանական ջոկատներ»-ին (ԺԻՋ-YPG):
ԱՄՆ պաշտոնաթող գեներալ Դանիել Քրիսմանն էլ ընդգծել է, որ չնայած առկա խնդիրներին՝ Թուրքիայի և ԱՄՆ-ի միջև տնտեսական, առևտրային հարաբերությունները շատ լավ վիճակում են գտնվում և սա շատ կարևոր մի հանգամանք է։
