Պուտինն ընտրությունների ընթացքում ընտրատեղամասերում հերթերը կապել է պատերազմին «աջակցության» հետ

ՌԴ նախագահ Վլադիմիր Պուտինը մեկնաբանել է սեպտեմբերի 18-20-ը Ռուսաստանում անցկացված Պետդումայի ընտրությունները և շնորհակալություն հայտնել ռուսաստանցիներին ընտրական գործընթացին «ակտիվ մասնակցության» համար։

«Հայտնի է, որ մեզ փորձում էին խանգարել, տապալել այս ընտրությունները, ինչի մասին վկայում են հակառակորդի՝ Մոսկվայի և այլ շրջանների ՀՕՊ համակարգերը ճեղքելու մշտական փորձերը։ Սակայն ընտրատեղամասերում գոյացած հերթերը վկայում են, որ Ռուսաստանին վախեցնելն անհնար է»,- կառավարության անդամների հետ խորհրդակցության ժամանակ հայտարարել է Պուտինը։

Նա հավելել է, որ «այդքան մեծ թվով մարդկանց մասնակցությունն ու քվեարկությունը» վկայում է այն մասին, որ «Ռուսաստանի ժողովուրդը աջակցում է երկրի ամրապնդմանն ուղղված մեր ջանքերին»։

«Ուզում եմ, որ դուք իմանաք, ընկերներ․ սա քվեարկություն է ձեզ համար։ Մարդիկ հավատում են ձեզ, հավատում են մեր հաղթանակին»,- դիմելով «Հատուկ ռազմական գործողության» մասնակիցներին՝ ասել է Պուտինը։

Կիրակի՝ սեպտեմբերի 20-ին, Մոսկվայի ընտրատեղամասերում նկատելի հերթեր էին գոյացել՝ հիմնականում այն պատճառով, որ էլեկտրոնային ընտրացուցակների համակարգի խափանման հետևանքով ընտրողները մի քանի ժամ շարունակ չէին կարողացել ստանալ թղթային քվեաթերթիկներ։

Բացի այդ, այս ընտրությունների ժամանակ ռուսական ընդդիմության առաջնորդները կոչ էին արել կիրակի օրը՝ տեղի ժամանակով ժամը 12:00-ին, գալ ընտրատեղամասեր՝ այդ կերպ իրենց բողոքն արտահայտելու համար։ Սակայն նման հերթերն ավելի քիչ էին, քան 2024 թվականի նախագահական ընտրությունների ժամանակ անցկացված «Կեսօրն ընդդեմ Պուտինի» ակցիայի ընթացքում։

Թարգմանությունը՝ Էմմա Չոբանյանի