ՌԴ-ն զանգվածային հարված է հասցրել Ուկրաինային․ զոհեր և վիրավորներ կան

Ուկրաինայի ԶՈՒ ռազմաօդային ուժերը հայտնել են, որ լույս երեքշաբթի գիշերը ռուսական զինված ուժերը հարձակվել են երկրի վրա «Օնիքս» հականավային հրթիռներով, «Իսկանդեր-Մ»/C-400/KN-23 բալիստիկ հրթիռներով, «Կալիբր» տեսակի չորս թևավոր հրթիռներով, «Բանդերոլ»/«Դան-T» տեսակի ութ հրթիռներով և 212 անօդաչու թռչող սարքերով։

Հարվածների հիմնական ուղղություններն են եղել Դնեպրոպետրովսկի, Կիրովոգրադի և Պոլտավայի մարզերը, հայտնել են Ուկրաինայի զինված ուժերի ռազմաօդային ուժերը։ Դնեպրում հարձակման հետևանքով զոհվել է չորս մարդ, ևս վեցը՝ տուժել։ Դնեպրոպետրովսկի մարզային ռազմական վարչակազմի ղեկավար Ալեքսանդր Գանժան հայտնել է, որ վնասվել են պահեստներ և ձեռնարկություն, Կրիվոյ Ռոգում և Պավլոգրադում նույնպես ձեռնարկություններ են վնասվել։

Կիևում ռուսական հարձակման հետևանքով պահեստներ են այրվել։ Դնեպրովսկի շրջանում, քաղաքապետ Վիտալի Կլիչկոյի հաղորդմամբ, վնասվել են հինգ հարկանի բնակելի շենքի ճակատային հատվածը և առաջին հարկը, բնակիչները տարհանվել են։

Ուկրաինայի արտակարգ իրավիճակների պետական ծառայությունը հայտնել է չորս, իսկ Ազգային ոստիկանությունը՝ հինգ տուժածի մասին։ Կիևի մարզի Բրովարի շրջանում այրվել է պահեստ, վնասվել է չորս մասնավոր բնակելի շենք, երեք մեքենա։

Պոլտավայի մարզի Կրեմենչուգի շրջանում, մարզային ռազմական վարչակազմի ղեկավար Վիտալի Դյակիվնիչի խոսքով, ռուսական հարվածների թիրախում են եղել արդյունաբերական ձեռնարկություն և կարևոր ենթակառուցվածքային օբյեկտ։ Պոլտավայի շրջանում անօդաչու թռչող սարքն ընկել է մասնավոր գյուղատնտեսական ձեռնարկության տարածքում, վնասվել են օժանդակ շինությունը և տեխնիկան։

Ռուսաստանի Պաշտպանության նախարարությունում հայտարարել են, որ խոցվել են մետալուրգիական և քիմիական արդյունաբերության, վառելիքաէներգետիկ և ռազմարդյունաբերական համալիրների ձեռնարկություններ, Կիևի, Դնեպրոպետրովսկի, Պոլտավայի և Օդեսայի մարզերի նավահանգստային ենթակառուցվածքների օբյեկտներ, ինչպես նաև ծովային նավեր։

Թարգմանությունը՝ Էմմա Չոբանյանի