Սահման ունե՞նք մենք պետական, պետք ա կարենանք պահենք՝ մինչև սահմանազատում լինի․ Սասուն Միքայելյան․ ՏԵՍԱՆՅՈՒԹ

Հայաստանի Հանրապետության Անկախության օրը «Եռաբլուր» զինվորական պանթեոն այցելած ԵԿՄ վարչության նախագահ, ԱԺ «Քաղաքացիական պայմանագիր» խմբակցության պատգամավոր Սասուն Միքայելյանը լրագրողների հետ ճեպազրույցում պնդեց, թե Հայաստանը մինչև օրս միջազգայնորեն ճանաչված և հաստատված պետական սահմաններ չի ունեցել։

«Մենք ասում ենք՝ անկախ ենք. ունեցե՞լ ենք մենք պետական սահման։ Մենք եղել ենք ուրիշ պետության վասալ, ինչ թելադրել են այս տարիների ընթացքում, արել ենք»,- ասաց Միքայելյանը։

Լրագրողի դիտարկմանը, թե ՀՀ միջազգայնորեն ճանաչված տարածքն ու սահմաններն ամրագրված են փաստաթղթերում, և որտե՞ղ են կանգնած ՀՀ զինծառայողները, Միքայելյանն արձագանքեց. «Ամրագրված է, բայց հաստատված չէ։ Մենք կանգնած ենք այնտեղ, որտեղ պիտի սահմանազատում լինի։ Կանգնենք մինչև սահմանազատում լինի, կարողանանք պահենք, որ սահմանազատման գնանք։ Ալիևն ինձ հեչ չի հետաքրքրում, ինձ հետաքրքրում է, որ մենք կարողանանք սահմանազատում իրականացնել»։

Ճեպազրույցի ընթացքում իրավիճակը լարվեց, երբ լրագրողը հարցրեց Արցախի հայաթափման տարելիցի և այն մասին, թե ինչու բարձրաստիճան պաշտոնյաները չեն այցելել Եռաբլուր։ Միքայելյանը նախ նշեց, որ այդ հարցը պետք է ուղղել հենց նրանց, ապա լրագրողներին մեղադրել զոհվածների անունը շահարկելու մեջ։

Այդ պահին Սասուն Միքայելյանի հետ «Եռաբլուր» այցելած տղամարդկանցից են միջամտել զրույցին՝ լրագրողների հասցեին հնչեցնելով կոպիտ արտահայտություններ։

Մանրամասները՝ տեսանյութում։

Անի Թամրազյան