Ասել էիք` Հայաստանով մեկ կտրելու եք ՔՊ-ի թևերը, ինչո՞ւ Թումանյանում թեկնածու չեք առաջադրել. հարց Տիգրան Աբրահամյանին․ ՏԵՍԱՆՅՈՒԹ

«Եթե Հայաստանում կա համայնք, որտեղ միայն իշխանական թեկնածուն է մասնակցում, դա վկայում է այն մասին, որ ժողովրդավարությունը խիստ կասկածի տակ է»։ Այս մասին ԱԺ-ում Factor TV-ի հարցին ի պատասխան հայտարարեց «Ուժեղ Հայաստան» խմբակցության քարտուղար Տիգրան Աբրահամյանը՝ անդրադառնալով սեպտեմբերի 27-ին Թումանյան համայնքում կայանալիք ՏԻՄ ընտրություններին։

«Ուժեղ Հայաստան» կուսակցությունը խորհրդարանական ընտրություններից հետո շրջում էր մարզերով, և Նարեկ Կարապետյանը հայտարարել էր, որ իրենք մասնակցելու են համայնքային ընտրություններին և «պետք է կտրեն ՔՊ-ի թևերը Հայաստանով մեկ»։

Մեր հարցին, թե այդ դեպքում ինչու «Ուժեղ Հայաստանը» թեկնածու չի առաջադրել Թումանյան համայնքում, Աբրահամյանը պատասխանեց։

«Մենք առանձին հայտարարությամբ հանդես կգանք, թե որ համայնքներում ենք մասնակցելու, և ՏԻՄ-երի միջոցով քաղաքական առումով կտրելու ենք իշխանության թևերը»,- ասաց նա։

Աբրահամյանի խոսքով՝ վերջին 3-4 ամիսներին «Ուժեղ Հայաստանի» աջակիցների և անդամների թիվը էականորեն ավելացել է, և կուսակցությունը թեկնածուների խնդիր չունի։

«Մենք թեկնածուների խնդիր չունենք, իշխանություններն ունեն մեր թեկնածուների հետ խնդիր։ Այնքան են քաղաքական առումով վախենում, որ դիմում են ձերբակալությունների»,- նշեց նա։

Անդրադառնալով Նարեկ Կարապետյանի հայտարարությանը, թե «Հայաստանով մեկ կտրելու են ՔՊ-ի թևերը», Աբրահամյանը պնդեց, որ իրենք արդեն իսկ առաջին քայլերն արել են՝ նշելով, որ «Քաղաքացիական պայմանագիրը» ընտրություններում չի ստացել 50+1 քվե և ըստ այդմ՝ չունի սահմանադրական մեծամասնություն։

Մանրամասները՝ տեսանյութում։

Արփի Հակոբյան