Թրամփը ՄԱԿ ԳՎ-ի շրջանակում Իրանի պատերազմը կքննարկի Պարսից ծոցի երկրների ղեկավարների հետ

ԱՄՆ նախագահ Դոնալդ Թրամփը հաջորդ շաբաթ Նյու Յորքում՝ ՄԱԿ-ի Գլխավոր վեհաժողովի շրջանակում, նախատեսում է հանդիպել Պարսից ծոցի երկրների ղեկավարների հետ՝ Իրանի դեմ պատերազմը քննարկելու համար, գրում է New York Post-ը։

Axios-ին աղբյուրները հայտնել են, որ հաջորդ երեքշաբթի նախատեսված բարձր մակարդակի հանդիպման ընթացքում ուշադրության կենտրոնում կլինեն Իրանի հետ պատերազմում հետագա քայլերը, այդ թվում՝ Թրամփի վարչակազմի՝ պատերազմից հետո իրականացվելիք ռազմավարությունը։ Ակնկալվում է, որ Թրամփի հետ կայանալիք հանդիպմանը կմասնակցեն Սաուդյան Արաբիայի, Արաբական Միացյալ Էմիրությունների, Կատարի, Բահրեյնի, Քուվեյթի և Օմանի ղեկավարները կամ արտաքին գործերի նախարարները։ Աղբյուրն Axios-ին հայտնել է, որ հանդիպումը կարող է ընդլայնվել՝ ներառելով արաբ և մահմեդական այլ առաջնորդների։

Պատերազմի ընթացքում Պարսից ծոցի երկրները և դրանց տարածքում տեղակայված ամերիկյան ռազմակայանները ենթարկվել են իրանական հրթիռային և անօդաչու սարքերի հարձակումների։

Պատերազմը նաև տնտեսական ցնցումների է ենթարկել արաբական երկրներին՝ խաթարելով նավթի և բնական գազի արտահանումը։

Վերջերս Թրամփը հաճախ է հայտարարում, որ պատերազմը կավարտվի աշնանային ընտրություններից կարճ ժամանակ անց։ ԱՄՆ փոխնախագահ Ջեյ Դի Վենսը նույնպես շաբաթվա սկզբին The Post-ին հայտնել էր, որ գրեթե յոթ ամիս տևող հակամարտությունը «մի քանի ամսից կթևակոխի բոլորովին այլ փուլ»։

Axios-ի տվյալներով՝ Իսրայելի վարչապետ Բենյամին Նեթանյահուն նույնպես ցանկանում է հանդիպել Թրամփի հետ ՄԱԿ-ի Գլխավոր վեհաժողովի շրջանակում, սակայն հանդիպում դեռևս նշանակված չէ։

Թարգմանությունը՝ Էմմա Չոբանյանի