Մեկնարկում է «Երևանի կարճամետրաժ ֆիլմերի միջազգային կինոփառատոնը»

ՀՀ մշակույթի նախարարության աջակցությամբ ս. թ. դեկտեմբերի 10-12-ը կկայանա «Երևանի կարճամետրաժ ֆիլմերի միջազգային կինոփառատոնը», որը կազմակերպում է «Երիտասարդության կամք» երիտասարդական հասարակական կազմակերպությունը:

Փառատոնի նպատակն է` նպաստել նոր կինոսերնդի ձևավորմանը, օժանդակել երիտասարդ ստեղծագործողներին գտնելու իրենց տեղը ժամանակակից կինոյում, ամրապնդել կապը Հայաստանի և օտարերկյա կինոգործիչների միջև, խթանել փորձի փոխանակմանը:

Փառատոնը բաղկացած է՝ միջազգային և ազգային ֆիլմերի մրցութային ծրագրերից, մրցանակներ կշնորհվի 10 անվանակարգերում:

Փառատոնի ցուցադրությունները տեղի է ունենալու «Երևանի թատրոնի և կինոյի պետական ինստիտուտի» «Անրի Վերնոյի» անվան սրահում և «Հայաստանի կինեմատոգրաֆիստների միության» փոքր դահլիճում:

Երևանյան հանդիսատեսին հնարավորություն կընձեռվի դիտելու հեղինակավոր միջազգային կինոփառատոների մրցանակակիր կարճամետրաժ կինոնկարները:
Փառատոնի հանդիսավոր փակման արարողությունը կկայանա դեկտեմբերի 12-ին, ժամը 19:00-ին, «Մոսկվա» կինոթատրոնում (մուտքը՝ հրավիրատոմսով):
Փառատոնի շրջանակում կայանալիք կարևոր իրադարձություններից է «INNOVATOR» ընկերության ներկայացուցիչների մասնակցությամբ կայանալիք «Ժամանակակից տեխնոլոգիաների օգտագործումը ֆիլմի հետարտադրական փուլում» վարպետության դասը, ինչպես նաև տեղի կունենա կինոտեխնիկայի շնորհանդես: Տեղի կունենա «Real boards» ընկերության ներկայացուցչի վարպետության դասը. կներկայացվի տեխնոլոգիական «Real boards» համակարգչային ծրագիրը:

Փառատոնի ֆիլմերի ցուցադրությունների և վարպետության դասերի մուտքն ազատ է: