11.10.2026 | 09:46
Մեսին ու Սուարեսը երկուական գոլ են խփել. ՏԵՍԱՆՅՈՒԹ
Մինսկն ազատ է արձակել 25 քաղբանտարկյալի․ ի պատասխան՝ ԱՄՆ-ն կչեղարկի բելառուսական 2 ընկերությունների դեմ պատժամիջոցները
Քաղաքականություն
16.09.2026 | 15:28
ԱՄՆ-ը կչեղարկի բելառուսական երկու ձեռնարկությունների՝ «Լակոկրասկա» ընկերության և «Բելլեսբումպրոմ» կոնցեռնի դեմ սահմանված պատժամիջոցները։ Այս մասին Մինսկում բանակցությունների արդյունքներով հայտարարել է Բելառուսի հարցերով ԱՄՆ նախագահի հատուկ բանագնաց Ջոն Քոուլը, գրում է Meduza-ն։
Քոուլը հայտնել է, որ Բելառուսը, «որպես բարի կամքի դրսևորում», կազատի 25 բանտարկյալի։ Թե կոնկրետ ովքեր են ազատ արձակվելու, նա չի հստակեցրել։
ԱՄՆ բանագնացի խոսքով՝ Մինսկն ու Վաշինգտոնը քննարկել են «միջազգային հարցեր, երկկողմ օրակարգի հարցեր և փոխադարձ հետաքրքրություն ներկայացնող այլ հարցեր», ինչպես նաև համաձայնեցրել են ինչ-որ «միջանկյալ համաձայնագիր»։ Կողմերը «կշարունակեն աշխատանքը մնացած հարցերի լուծման ուղղությամբ»։
«Երբ բոլոր հարցերը լուծվեն և համաձայնեցվեն երկու կողմերի կողմից, կլինեն անձանց լրացուցիչ ազատումներ և բելառուսական ընկերությունների նկատմամբ պատժամիջոցների վերացում»,- ասել է նա։
Միաժամանակ, Քուոլը X-ում գրառմամբ հայտնել է, որ բանտարկյալներն արդեն ազատ են արձակվել։
«Այսօր 25 բանտարկյալ ազատ է արձակվել։ Նախագահ Թրամփի՝ ուղիղ դիվանագիտությանը նվիրված ջանքերն արդյունք են տալիս։ Շնորհակալություն, նախագահ Լուկաշենկո, այս քայլի համար, ինչպես նաև շնորհակալություն մեր բարեկամներին Լիտվայում՝ աջակցության համար։ Մենք կշարունակենք բարելավել ԱՄՆ-Բելառուս հարաբերությունները և աշխատում ենք շատ մոտ ապագայում ավելի շատ մարդկանց ազատ արձակելու ուղղությամբ։ Մենք դեռ չենք ավարտել մեր աշխատանքը»,-գրել է նա։
Ջոն Քոուլը սեպտեմբերի 15-ին ժամանել է Մինսկ՝ Ալեքսանդր Լուկաշենկոյի հետ բանակցությունների համար։ Դրանից առաջ նա մեկնել էր Վիլնյուս, որտեղ հանդիպել էր Լիտվայի արտաքին գործերի նախարար Կյաստուտիս Բուդրիսի հետ։ Նրանք քննարկել էին Բելառուսում քաղբանտարկյալների ազատ արձակմանն ուղղված ջանքերը և տարածաշրջանում անվտանգության իրավիճակը։
Թարգմանությունը՝ Էմմա Չոբանյանի
