16.09.2026 | 14:31
ԵՀ նախագահը Կանադային առաջարկել է դառնալ միության առաջին «ասոցացված անդամը»
Տերը, ձեր պատկերացմամբ, Ռուսաստանն է, դրա համար եք ասում՝ անտեր կմնանք․ Մինասյանը՝ Ֆարմանյանին․ ՏԵՍԱՆՅՈՒԹ
Քաղաքականություն
16.09.2026 | 14:06
Ազգային ժողովի «Քաղաքացիական պայմանագիր» խմբակցության պատգամավոր Լիլիթ Մինասյանը, անդրադառնալով ընդդիմադիր պատգամավոր Հայկ Ֆարմանյանի այն հայտարարությանը, թե 102-րդ ռուսական ռազմաբազայի դուրսբերման դեպքում Հայաստանը «անտեր կմնա»՝ նման կերպ արձագանքեց․
«Պարո՛ն Ֆարմանյան, ի՞նչ կապ ունի աշխատատեղը, Շիրակի մարզում ռուսական ռազմաբազայի մուլտիպլիկատիվ էֆեկտով ստեղծված աշխատատեղերը տիրոջ հետ: «Անտեր կմնանք» արտահայտության ստուգաբանությունն ի՞նչ կապ ունի: Տերը, ձեր պատկերացմամբ, Ռուսաստանն է, դրա համար եք դուք ասում՝ «անտեր կմնանք»։ Ես առաջարկում եմ, պարո՛ն Կարապետյան, ձեր ռուս գործընկերներին առաջարկեք Հայկ Ֆարմանյանին այստեղ նշանակել Ռուսաստանի դեսպան:Այդպիսի մեծ ջանքերով պաշտպանում եք։ Ձեր թեզը հարյուրամյա հնացած թեզ է՝ «ռուսը չլինի, թուրքը մեզ կուտի»»։
Պատգամավորի գնահատմամբ՝ ընդդիմադիրները ցանկացած թեմա տանում են Ադրբեջանի և Թուրքիայի դաշտ, սակայն լռում են, երբ ռուսական մեդիայից վիրավորանքներ են հնչում Հայաստանի հասցեին։
«Դուք հարևան պետությունների ցանկացած պաշտոնյայի արձագանքին շատ սուր եք վերաբերվում, բայց մեր բարեկամ պետության պրոպագանդիստների վիրավորանքներին ծպտուն չեք հանում. այսպես հենց կարում եք ձեր բերանները, նստում եք: Պաշտպանում եք մի պետության ներկայացուցչություն, որն ասել է՝ «А кому там нужна Армения?»»․- ընդգծեց իշխանական պատգամավորը։
Մանրամասները՝ տեսանյութում։
Անի Թամրազյան
