Քաղաքականություն
16.09.2026 | 13:40«Քաղաքացիական պայմանագիր» կուսակցության վարչության նիստում քննարկվել է պատգամավոր Հայկ Սարգսյանի վարքագծի և կարգապահական հարցը։ Այս մասին Factor TV-ի հետ զրույցում հայտնեց ՔՊ պատգամավոր Հասմիկ Հակոբյանը՝ նշելով, որ թեև վերջնական որոշում դեռ չկա, սակայն քննարկումները շարունակվելու են։
Ըստ Հակոբյանի՝ վարչության նիստի ընթացքում Վերահսկող հանձնաժողովի զեկույցների հիման վրա քննարկվել են շուրջ 6-7 կուսակցականների հարցեր։
Ինչ վերաբերում է Հայկ Սարգսյանին, ապա նրա հետ կապված մտահոգությունները վերաբերում են կուսակցության բարի համբավի արատավորմանը, թիմակիցների հասցեին անհիմն ու զրպարտչական հայտարարություններին, ինչպես նաև հնարավոր շահերի բախման դրվագներին։
«Պարոն վարչապետը նշեց տարբեր դրվագներ, այդ թվում՝ օրենսդրական նախաձեռնությունների շուրջ շահառուների հետ խոսակցություններն ու շահերի բախումը։ Հայկ Սարգսյանը նախկինում ևս ունեցել է խիստ նկատողություններ, օրինակ՝ կեղծ պետհամարանիշների կիրառման կամ վարչապետի անունը շահարկելու հետ կապված։ Չի բացառվում, որ քննարկումների արդյունքում ընդհուպ նրան կուսակցությունից հեռացնելու որոշում կայացվի»,- ընդգծեց պատգամավորը։
Պատասխանելով այն հարցին, թե ինչպես էր Հայկ Սարգսյանը ներկա գտնվել ՔՊ վերջին հավաքին, Հակոբյանը պարզաբանեց, որ նա մասնակցել է ոչ թե քաղաքական ժողովի փակ մասին, այլ դրան հաջորդած ոչ պաշտոնական ճաշին, որին հրավիրված են եղել ԱԺ նախորդ գումարման բոլոր պատգամավորները։
Մանրամասները` տեսանյութում։
Նարեկ Կիրակոսյան
