Ուկրաինայի պատերազմում զոհվել է ռուս գեներալը, որը Պուտինին զեկուցել էր Կոստանտինովկայի «գրավման» մասին

Ուկրաինայի պատերազմում զոհվել է ռուսական բանակի գեներալ-մայոր Անտոն Գրունիսը։ Այս մասին հայտնում են Սուվորովյան ռազմական ուսումնարանի շրջանավարտների և ռազմական բլոգեր Յուրի Կոտենոկի տելեգրամ ալիքները։ Գրունիսը մասնակցել է Չասով Յարի ուղղությամբ հարձակումներին և ղեկավարել Դոնեցկի մարզում գտնվող Կոստանտինովկայի ուղղությամբ ռուսական զորքերի հարձակումը։

Ըստ ռուսական լրատվամիջոցների՝ հենց Գրունիսն էր հուլիսի սկզբին Ռուսաստանի նախագահ Վլադիմիր Պուտինին հայտնել, որ Կոստանտինովկան ամբողջությամբ գրավվել է ռուսական զորքերի կողմից։ Միաժամանակ, սակայն, Ռուսաստանի Պաշտպանության նախարարության մամուլի ծառայությունը շարունակում էր հաղորդել Կոստանտինովկայում ընթացող մարտերի մասին, իսկ Ուկրաինայի զինված ուժերը հերքում էին, որ քաղաքն անցել է ռուսական վերահսկողության տակ։

Քաղաքի գրավման մասին տեղեկությունը հերքել էր նաև Ուկրաինայի նախագահ Վլադիմիր Զելենսկին՝ Պուտինին առաջարկելով «հանդիպել Կոստանտինովկայում, եթե այն իսկապես գտնվում է Ռուսաստանի վերահսկողության տակ»։

Կոստանտինովկայի համար մարտերը սկսվել են 2025 թվականի հոկտեմբերին և շարունակվում են մինչ օրս։

Զոհվելուց երկու շաբաթ առաջ՝ օգոստոսի 27-ին, Անտոն Գրունիսը ներկայացվել էր ՌԴ բարձրագույն պարգևին՝ Ռուսաստանի հերոսի շքանշանի։

Գրունիսի զոհվելու հանգամանքները չոն հստակեցվում։ «Важные истории»-ն, վկայակոչելով արտահոսած տվյալները, գրում է, որ նա կցված էր Լուգանսկի մարզի Ալչևսկ քաղաքին։ Սեպտեմբերի 13-ին Ուկրաինայի զինված ուժերը հայտնել էին այդ քաղաքի ուղղությամբ հարվածի մասին։ Հարձակման թիրախում եղել են նյութատեխնիկական ապահովման, զենքի և տեխնիկայի պահեստները։ Նույն օրը Ուկրաինայի անվտանգության ծառայությունը հարձակվել էր Ալչևսկի մերձակայքում գտնվող Կարպատի ավանի վրա։ Չհաստատված տեղեկությունների համաձայն՝ հարվածի տակ է հայտնվել ռազմական տեխնիկան։

Թարգմանությունը՝ Էմմա Չոբանյանի