Քաղաքականություն
15.09.2026 | 21:11
«Եվրոպական խորհրդարանը կոռուպցիոներների որջ է։ Ես սա ասում եմ ամենայն պատասխանատվությամբ։ Եվրոպական խորհրդարանի փոխնախագահի տնից առգրավել են միլիոնավոր դոլարներով լի ճամպրուկներ, սակայն այդ ամենը կոծկվել է։ Նրա անունը հայտնի է, նա Հունաստանից ընտրված կին պատգամավոր է։ Նրա նկատմամբ որևէ միջոց ձեռնարկվե՞լ է։ Ո՛չ։ Նա պատասխանատվության ենթարկվե՞լ է։ Ո՛չ։ Նրան ազատ են արձակել։ Եվրոպական խորհրդարանը բաղկացած է իսլամատյացներից»,- ասել է Ալիևը։
Նա հայտարարել է, թե «այժմ, երբ Ադրբեջանը դառնում է ավելի ուժեղ և լիարժեք օգտագործում է իր ներուժը, Արևմուտքում նրա դեմ կրկին կեղտոտ մեդիաարշավ է ծավալվում»։ Նա ասել է, թե Ադրբեջանին, իբր, զրպարտում են, ամեն օր հրապարակվում են ենթադրություններով և զրպարտություններով լի հոդվածներ։
«Ադրբեջանն այն քիչ մուսուլմանական երկրներից է, որն անդամակցում է եվրոպական կազմակերպություններին։ Հետևաբար, մենք գիտենք, թե ինչ է կատարվում այնտեղ։ Որպես Եվրոպայի խորհրդի անդամ՝ մենք բախվել ենք, բախվում ենք և, հավանաբար, կբախվենք այս անարդարություններին։ Մեր դեմ այս չհայտարարված զրպարտչական արշավը երբեք չի դադարի»,- հայտարարել է Ադրբեջանի նախագահը։
Թարգմանությունը՝ Էմմա Չոբանյանի
