«Քրոջս հաշվին եք ուզում «հողեր հետ բերել», որը զոհվել է 2022-ին՝ ծառայության ընթացքում»․ Ալխաս Ղազարյան․ ՏԵՍԱՆՅՈՒԹ

Ազգային ժողովում «Քաղաքացիական պայմանագիր» խմբակցության պատգամավոր Ալխաս Ղազարյանը քննադատեց ընդդիմադիր գործիչներին և հայտարարեց, որ ընդդիմությունը փորձում է Հայաստանը նորից տանել աշխարհքաղաքական փակուղի։

Ալխաս Ղազարյանի պնդմամբ՝ ընդդիմության որդեգրած ճանապարհը հարևանների հետ կոնֆլիկտներ հրահրելն է և երկրի համար աշխարհքաղաքական փակուղի ստեղծելը։ Պատգամավորի խոսքով՝ հենց նմանատիպ փակուղային իրավիճակներն են նախկինում հնարավորություն տվել որոշ ընտանիքների և գործիչների, մասնավորապես՝ Գագիկ Խաչատրյանին, Ռոբերտ Քոչարյանին և Կարապետյաններին, կուտակել միլիարդավոր դոլարների կարողություններ, ունենալ մենաշնորհներ և պահել իշխանությունը։

Անդրադառնալով վերջին քաղաքական զարգացումներին՝ պատգամավորը նշեց, որ ականատես են լինում նոր գործընթացների, որոնց սցենարը նույնն է՝ տարածքային պահանջներ ներկայացնել, կոնֆլիկտներ հրահրել, խոչընդոտել սահմանազատմանը և դրա հիման վրա հասնել իշխանության։ Ղազարյանի գնահատմամբ՝ սա հնարավորություն է տալիս արտաքին հովանավորներին խուսափել իրենց պայմանագրային պարտավորություններից՝ պատճառաբանելով, թե Հայաստանը սահմաններ չունի։

Ելույթի ավարտին ՔՊ պատգամավորն անդրադարձավ Սամվել Կարապետյանի հայտարարությանը «հողեր հետ բերելու» մասին։ Ղազարյանը շեշտեց, որ նման հայտարարություններ անողների զավակներն ու զարմիկները ժամանակին խուսափել են բանակում ծառայելուց։

«Լեգիտիմ հարց է առաջանում՝ ո՞ւմ զավակների արյան հաշվին եք փորձում հողեր հետ բերել․ քրոջս հաշվի՞ն՝ Ալիսա Մելքոնյանի, ով զոհվել է 2022 թվականին ծառայության ընթացքում»,- իր ելույթում ընդգծեց Ալխաս Ղազարյանը։

Մանրամասները՝ տեսանյութում։

Եվգենյա Համբարձումյան