15.09.2026 | 16:11
Վարդան Ղուկասյանն ասել ա՝ «Ով միութենական պետությանը դեմ ա, թրքահպատակ շան տղա ա»․ Վահագն Ալեքսանյան․ ՏԵՍԱՆՅՈՒԹ
«Արդեն մեկ տարի կապրեինք առանց պատերազմի». Լավրովը ԱՄՆ-ին մեղադրել է «Անքորիջից հրաժարվելու» պատճառով պատերազմը ձգձգելու մեջ
Քաղաքականություն
15.09.2026 | 15:41
Ռուսաստանի ԱԳ նախարար Սերգեյ Լավրովը քննադատել է ուկրաինական պատերազմի ավարտի վերաբերյալ Վաշինգտոնի դիրքորոշումը՝ «ԱՄՆ-ի հրաժարումը Անքորիջի պայմանավորվածություններից» անվանելով Ռուսաստանի կողմից Ուկրաինայի դեմ վարվող պատերազմի շարունակության պատճառ, գրում է BBC-ի ռուսական ծառայությունը։
«Եթե ամերիկացիները չհեռանային Անքորիջի պայմանավորվածություններից, եթե Եվրոպան նրանց չշեղեր այդ պայմանավորվածություններից, մենք արդեն մեկ տարի կապրեինք առանց պատերազմի։ Սա ակնհայտ փաստ է»,- հայտարարել է Լավրովը «Ուկրաինական ճգնաժամը․ Արևմուտքի իրավական ագրեսիան» թեմայով դեսպանների 13-րդ կլոր սեղանի ընթացքում։
Ռուսաստանի նախագահ Վլադիմիր Պուտինի և ԱՄՆ նախագահ Դոնալդ Թրամփի հանդիպումը տեղի էր ունեցել Ալյասկայի Անքորիջ քաղաքում՝ 2025 թվականի օգոստոսի կեսերին։ Հանդիպման արդյունքները հրապարակայնորեն չեն բացահայտվել, սակայն դրանից հետո ռուս դիվանագետներն ու պաշտոնյաները սկսեցին խոսել «Անքորիջի պայմանավորվածությունների» և «Անքորիջի ոգու» մասին՝ որպես Ուկրաինայում խաղաղ կարգավորման շուրջ բանակցությունների՝ երկու կողմերի կողմից համաձայնեցված քաղաքական շրջանակի։
Ըստ BBC-ի՝ ռուսաստանցի պաշտոնյաները հասկացնում էին, որ այդ ժամանակ ԱՄՆ-ի և Ռուսաստանի նախագահները համաձայնության էին եկել, որ Ուկրաինայում պատերազմի ավարտի պայմանը Մոսկվային Դոնբասի ամբողջ տարածքի փոխանցումն է, այդ թվում՝ այն տարածքների, որոնք Ռուսաստանը դեռևս չի օկուպացրել։
Սակայն, ըստ ամենայնի, Պուտինն ու Թրամփը հանդիպման ժամանակ որևէ պայմանավորվածության չէին եկել, ինչը հաստատել է ԱՄՆ պետքարտուղար Մարկո Ռուբիոն 2026 թվականի ամռանը Լավրովի հետ հանդիպումից հետո։
Այդ ժամանակ Լավրովը եվրոպացի քաղաքական գործիչներին մեղադրել էր այն բանում, որ նրանք, իբր, ԱՄՆ-ին համոզել են հրաժարվել բանակցությունների՝ այդ ուղղությամբ շարժվելուց։ Ամերիկյան լրատվամիջոցները գրել էին, որ Վաշինգտոնում տպավորված էին ռազմաճակատում Ուկրաինայի գրանցած հաջողություններով և տարածքային հարցում Ռուսաստանի անզիջում դիրքորոշումից և համարել էին, որ բանակցությունները «սպառված են»։
ԱՄՆ-ի, Ռուսաստանի և Ուկրաինայի միջև եռակողմ բանակցությունների հնարավոր վերսկսման մասին կրկին սկսեցին խոսել այն բանից հետո, երբ Դոնալդ Թրամփի ներկայացուցիչները սեպտեմբերի սկզբին այցելեցին Մոսկվա և Կիև։
Կլոր սեղանի ընթացքում Լավրովը նաև հայտարարել է, որ Ռուսաստանը պատրաստ է ԱՄՆ-ի և Ուկրաինայի մասնակցությամբ բանակցությունների նոր փուլին։
«Մենք երբեք չենք հրաժարվել բանակցություններից։ Եվ բոլոր այն բանակցությունները, որոնք տեղի են ունեցել, ընդհատվել են ոչ մեր նախաձեռնությամբ։ Հետևաբար, եթե մեր գործընկերները պատրաստ լինեն, կարծում եմ՝ միանգամայն հնարավոր է վերսկսել դրանք։ Մենք ասելիք ունենք»,- ասել է Լավրովը։
Նա նաև հայտնել է, որ մտադիր է ՄԱԿ-ի Գլխավոր վեհաժողովի շրջանակում Նյու Յորքում հանդիպել ԱՄՆ պետքարտուղար Մարկո Ռուբիոյի հետ։
ՄԱԿ-ի անդամ երկրների արտաքին գործերի նախարարների մասնակցությամբ միջոցառումները նախատեսված են սեպտեմբերի 22-28-ը։
Թարգմանությունը՝ Էմմա Չոբանյանի
