Միգուցե ՀԷՑ-ի տնօրենի աշխատավարձը էդքան չի, որ իշխանությունը փորձի «Վեոլիան» խլել․ Մխիթարյան․ ՏԵՍԱՆՅՈՒԹ

Ազգային ժողովում Տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի ընտրության հարցի քննարկման ժամանակ ԱԺ փոխնախագահ, «Ուժեղ Հայաստան» խմբակցության պատգամավոր Արամ Վարդևանյանը հարցադրումներ ուղղեց իր թիմակից, հանձնաժողովի նախագահի թեկնածու Ռուբեն Մխիթարյանին։

Անդրադառնալով քաղաքական հետապնդումների թեմային՝ Վարդևանյանը հիշեցրեց Մխիթարյանի՝ նախկինում երկու ամիս «Արթիկ» ՔԿՀ-ում անցկացրած կալանքի դրվագը։ Ի պատասխան՝ Մխիթարյանը նշեց, որ խորհրդարան գալիս հույս ուներ, թե իշխանությունը գոնե ներողություն կխնդրի շինծու քաղաքական պատվերների համար, սակայն ականատես եղավ հակառակին։ 

Նա վստահություն հայտնեց, որ առաջիկայում այս ամբիոնից կամ հանձնաժողովի նիստերում պատասխանատվության է կանչելու Գլխավոր դատախազին և ՔԿ նախագահին։

Երկրորդ հարցադրումը վերաբերում էր ենթակառուցվածքների նկատմամբ իշխանության տարբերակված վերաբերմունքին։

Վարդևանյանը շեշտեց, որ եթե ՀԷՑ-ի շուրջ «ակնհայտ խլման պրոցես» նախաձեռնվեց, ապա «Վեոլիա ջուր» ընկերության պարագայում, չնայած պարբերական անջատումներին և թունավորման դեպքերին, իշխանությունն անգործություն է ցուցաբերում։

Մխիթարյանը համակարծիք էր գործընկերոջ հետ՝ ընդգծելով, որ ՀԷՑ-ը խլելուց հետո բնակչությունն անջատումներն ավելի շատ է զգում իր մաշկի վրա, քան նախկինում։

«Մենք պետք է մեկ պարզ հարցի պատասխանենք․ միգուցե ՀԷՑ-ի գլխավոր տնօրենի աշխատավարձն էդքան չի՞, որ այս պահին իշխանությունը փորձի նաև «Վեոլիան» խլել»,- ասաց ընդդիմադիր թեկնածուն։

Մանրամասները՝ տեսանյութում։

Անի Թամրազյան