05.11.2026 | 00:08
Ինչ է որոշել ընդդիմությունը. Նարեկ Կարապետյանը հանդիպումից հետո մանրամասներ հայտնեց. ՏԵՍԱՆՅՈՒԹ
ԱՄՆ-ն ռուսական ՎՏԲ բանկը ներառել է պատժամիջոցների ցանկում՝ Իրանի դեմ սահմանափակումները շրջանցելուն մասնակցելու համար
Քաղաքականություն
15.09.2026 | 11:05
ԱՄՆ Ֆինանսների նախարարությունը ռուսական ՎՏԲ բանկը ներառել է պատժամիջոցների ցանկում՝ Իրանի նկատմամբ սահմանված սահմանափակումները շրջանցելուն մասնակցելու պատճառով, գրում է Meduza-ն։
Տարածված հաղորդագրությունում նշվում է, որ ՎՏԲ-ն ներկայացուցչություններ է բացել Իրանում, հաշվարկներ է իրականացրել պատժամիջոցների տակ գտնվող իրանական բանկերի հետ, մասնակցել է «սառեցված իրանական ակտիվներից միլիարդավոր դոլարների տեղափոխմանը»։
ԱՄՆ ֆինանսների նախարարության՝ պատժամիջոցների համար պատասխանատու ստորաբաժանման նախկին աշխատակից, վերլուծաբան Միադ Մալեքին կարծիք է հայտնել, որ ՎՏԲ-ի դեմ սահմանված պատժամիջոցները պետք է դիտարկել որպես Չինաստանի վրա ԱՄՆ-ի ճնշման տարր, որտեղ գտնվում է իրանական նավթային եկամուտների զգալի մասը։ Մալեքին նշել է, որ ՎՏԲ-ն միակ ռուսական բանկն է, որն ունի մասնաճյուղ մայրցամաքային Չինաստանում և հասանելիություն Չինաստանի ազգային վճարային համակարգին։ Չինաստանի բանկերը շարունակում են աշխատել ՎՏԲ-ի հետ, թեև այն վաղուց ընդգրկված է Ռուսաստանի դեմ ԱՄՆ-ի պատժամիջոցների ցանկում։ Նրա կարծիքով՝ ԱՄՆ Ֆինանսների նախարարությունն ակնկալում է, որ այժմ չինական բանկերը կսկսեն հրաժարվել ՎՏԲ-ի հետ համագործակցությունից՝ հնարավոր երկրորդային պատժամիջոցների մտավախությունից ելնելով։
ՎՏԲ-ն պետական վերահսկողության տակ գտնվող Ռուսաստանի մեծությամբ երկրորդ բանկն է։ ԱՄՆ-ն ՎՏԲ-ի նկատմամբ առաջին անգամ սահմանափակումներ է կիրառել դեռևս 2014 թվականին՝ Ղրիմի բռնակցման պատճառով։ 2022 թվականին՝ Ռուսաստանի կողմից Ուկրաինա լայնածավալ ներխուժումից հետո, բանկը հայտնվել է ԱՄՆ-ի արգելափակող պատժամիջոցների տակ։
Թարգմանությունը՝ Էմմա Չոբանյանի
