Հայաստանի և Վրաստանի ՆԳ նախարարները քննարկել են հանցավորության դեմ պայքարի և անվտանգության ոլորտում համագործակցությունը

ՀՀ ՆԳ նախարար Արփինե Սարգսյանը Վրաստան կատարած աշխատանքային այցի շրջանակում հանդիպել է Վրաստանի ՆԳ նախարար Սուլխան Թամազաշվիլիի հետ։ Կողմերը քննարկել են հանցավորության դեմ պայքարի, հասարակական կարգի և անվտանգության ապահովման, ինչպես նաև իրավապահ կառույցների միջև համագործակցության խորացման հարցերը։

«Արփինե Սարգսյանին նույն օրը ընդունել է Վրաստանի ՆԳ նախարար Սուլխան Թամազաշվիլին։
Կայացել է պաշտոնական հանդիսավոր արարողություն, ինչի ընթացքում Արփինե Սարգսյանն ու Սուլխան Թամազաշվիլին ծաղկեպսակ են դրել ծառայողական պարտականությունները կատարելիս զոհված ոստիկանների հուշակոթողին։

Հանդիպմանը Սուլխան Թամազաշվիլին բարձր է գնահատել երկու երկրների ներքին գործերի նախարարությունների միջև գործընկերային սերտ հարաբերությունները՝ ընդգծելով, որ ակտիվ շփումները հնարավորություն են ընձեռում համագործակցությունը դարձնել առավել հասցեական ու արդյունավետ։

Շնորհակալություն հայտնելով ջերմ ընդունելության համար՝ Արփինե Սարգսյանն ընդգծել է, որ Հայաստանի ու Վրաստանի միջև պատմականորեն ձևավորված են ամուր կապեր՝ հիմնված ընդհանուր արժեքների, փոխադարձ վստահության և բարեկամության վրա։

Քննարկվել են առանցքային նշանակության, մասնավորապես՝ հանցավորության դեմ պայքարի, հասարակական կարգի և անվտանգության ապահովման վերաբերյալ հարցեր։

Նշվել է, որ հանցավորության արդի մարտահրավերները նաև անդրազգային բնույթ ունեն, ուստի առավել կարևոր է իրավապահ կառույցների միջև օպերատիվ տեղեկատվության փոխանակումը, գործողությունների համակարգումն ու համատեղ աշխատանքային մեխանիզմների ներդրումը։

Անդրադարձ է կատարվել ՆԳՆ ենթակա ծառայությունների միջև փորձի փոխանակման ու համատեղ ծրագրերի իրականացման հնարավորություններին։
Հ
անդիպման ընթացքում Հայաստանի և Վրաստանի ՆԳ նախարարները ընդգծել են Հարավային Կովկասում կայուն խաղաղության պահպանման կարևորությունը։

Քննարկվել են երկկողմ համագործակցությանն առնչվող և փոխադարձ հետաքրքրություն ներկայացնող այլ հարցեր»,- ասվում է հաղորդագրությունում: