11.10.2026 | 10:11
Շանհայ. Կարեն Խաչանովը դուրս եկավ 1/8 եզրափակիչ
Կրեմլը ողջունել է Կիևին ուղղված Թրամփի կոչը՝ դադարեցնել ՌԴ-ի տնտեսական ենթակառուցվածքների վրա հարձակումները
Քաղաքականություն
14.09.2026 | 17:57
Կիևին ուղղված ցանկացած կոչ՝ դադարեցնելու խաղաղ տնտեսական ենթակառուցվածքների վրա հարձակումները, կարող է միայն ողջունվել։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով ԱՄՆ նախագահ Դոնալդ Թրամփի համապատասխան կոչը, գրում է Ինտերֆաքսը։
«Անշուշտ, կարելի է միայն ողջունել Կիևին ուղղված ցանկացած կոչ՝ դադարեցնելու հարձակումները խաղաղ տնտեսական ենթակառուցվածքների վրա»,- լրագրողներին ասել է ՌԴ նախագահի մամուլի քարտուղարը՝ պատասխանելով հարցին՝ արդյո՞ք Կրեմլում Թրամփի՝ դիզելային վառելիք արտադրող ենթակառուցվածքների վրա հարձակումներից զերծ մնալու մասին Ուկրաինայի նախագահ Վլադիմիր Զելենսկիին ուղղված կոչը համարում են հակամարտության կարգավորման համար դրական քայլ։
Միաժամանակ, Պեսկովը չի պատասխանել հարցին՝ արդյո՞ք Ռուսաստանը, Ուկրաինայի կողմից կոչին դրական արձագանքելու դեպքում, պատրաստ է ձեռնպահ մնալ Կիևի տնտեսական ենթակառուցվածքների վրա հարձակումներից։
«Ընդհանուր առմամբ, ցանկացած երկիր կարող է իր ազդեցությունն օգտագործել Կիևի վրա՝ նրան ավելի ճկուն լինելուն դրդելու համար, ինչն էական ներդրում կլինի կարգավորման գործում»,- լրագրողներին ասել է Պեսկովը՝ պատասխանելով հարցին, թե Գլոբալ հարավի երկրներն ինչ կարող են անել ուկրաինական հակամարտության կարգավորման համար։
Նա նշել է, որ Նյու Դելիում իրենց շփումների ժամանակ Չինաստանի նախագահ Սի Ցզինպինը և Հնդկաստանի վարչապետ Նարենդրա Մոդին «ակտիվ հետաքրքրություն են հայտնել ուկրաինական խնդրի նկատմամբ և խոսել իրենց երկրների պատրաստակամության մասին՝ անհրաժեշտության դեպքում դերակատարում ունենալ կարգավորման գործում։
«Դա բավական դրական է ընդունվել նախագահ Պուտինի կողմից։ Նա լրացուցիչ պարզաբանումներ է ներկայացրել այն մասին, թե իրականում ինչպիսին է իրավիճակը կարգավորման շուրջ և ինչպիսին է իրական իրավիճակը ճակատներում»,- ասել է Կրեմլի ներկայացուցիչը։
Ավելի վաղ ԱՄՆ նախագահ Դոնալդ Թրամփը հայտարարել էր, որ կոչ է արել Ուկրաինայի նախագահ Վլադիմիր Զելենսկիին դադարեցնել դիզելային վառելիքի արտադրությամբ զբաղվող ռուսական ձեռնարկությունների վրա հարձակումները։
«Մենք այդ մասին խոսել ենք պարոն Զելենսկիի հետ։ Կան բազմաթիվ այլ թիրախներ։ Պետք չէ հարվածել դիզելին։ Դա վնասում է [ամբողջ] աշխարհին»,- ասել է Թրամփը։
ԱՄՆ նախագահի խոսքով՝ ռուսական նավթավերամշակման գործարանների վրա հարձակումները հանգեցնում են դիզելային վառելիքի պակասի և դրա գների աճի։
«Դա տեղի է ունենում ոչ թե Մերձավոր Արևելքի պատճառով, այլ այն ամենի պատճառով, ինչ կատարվում է Ռուսաստանի և Ուկրաինայի միջև»,- հայտարարել է նա։
Թարգմանությունը՝ Էմմա Չոբանյանի
