Քաղաքականություն
14.09.2026 | 12:02
Ուկրաինայի նախագահ Վլադիմիր Զելենսկին հրամանագիր է ստորագրել տասը ֆիզիկական անձանց նկատմամբ պատժամիջոցներ սահմանելու մասին, որոնց թվում է նրա նախկին մամուլի քարտուղար Յուլիա Մենդելը։ Պատժամիջոցների տակ հայտնված մյուս անձինք Ռուսաստանի Դաշնության քաղաքացիներ են՝ Սվետլանա Լարինա, Իզաբելլա Լիբերման, Դիանա Մալիկ, Ալեքսանդր Մինեև, Ալեքսեյ Պլոտնիկով, Օլեգ Ռեզեպկին, Մարիա Ռումյանցևա, Սոֆյա Սամբուլովա և Եվգենի Ստրունկին։
Ի պատասխան՝ Մենդելը հայտարարել է, որ տեղյակ է եղել իրեն պատժամիջոցների ցուցակում ներառելու սպասվող որոշման մասին: Նա որոշումն անվանել է «հակասահմանադրական» և պնդել, որ Զելենսկին «այն օգտագործում է բոլորի դեմ, ովքեր հանդես են գալիս Ուկրաինայում խաղաղության օգտին»:
Մայիսին Մենդելը հարցազրույց էր տվել ամերիկացի լրագրող Թաքեր Կառլսոնին, որի ընթացքում ռուսական քարոզչության որոշ թեզեր էր հնչեցրել։ Մասնավորապես, նա Զելենսկիին անվանել էր խաղաղության հաստատման «ամենամեծ խոչընդոտներից մեկը» և հայտարարել, որ Ուկրաինան «վերացման եզրին է»։
Նա նաև պնդել էր, թե 2022 թվականին Ուկրաինայի իշխանությունները ռուսական կողմի հետ Ստամբուլում անցկացված բանակցությունների ընթացքում, իբր, համաձայն էին հանձնել Դոնբասը։ Սակայն նախագահի խորհրդական Դմիտրի Լիտվինը լրագրողներին հայտնել է, որ Մենդելը որևէ ձևով չի մասնակցել բանակցային գործընթացին։
Յուլիա Մենդելը Վլադիմիր Զելենսկիի մամուլի քարտուղարի պաշտոնը զբաղեցրել է 2019 թվականին՝ նախագահի պաշտոնում նրա ընտրվելուց հետո, իսկ պաշտոնից հեռացել է 2021 թվականի հուլիսին։
Թարգմանությունը՝ Էմմա Չոբանյանի
