Օմանը հետաձգել է Հորմուզի նեղուցի շուրջ Իրանի և տարածաշրջանի երկրների հետ բանակցությունները

Իրանի և Օմանի միջև բանակցությունները հետաձգվել են «տարածաշրջանի որոշ երկրների խնդրանքով»։ Այս մասին X-ում իրանական IRNA-ի հաղորդմամբ, նշել է Իրանի արտաքին գործերի նախարարության պաշտոնյա Մոհամմադ Ալի Բաքը։

Պարսից ծոցի երկրներից մեկի պաշտոնյան անանունության պայմանով AP-ին հայտնել է, որ Սաուդյան Արաբիան փոփոխություններ է առաջարկել Իրանի և Օմանի միջև համաձայնագրում՝ մտահոգություն հայտնելով, որ ձևավորվող գործարքը կարող է երկարաժամկետ հետևանքներ ունենալ Հորմուզի նեղուցի համար և բացասաբար անդրադառնալ Պարսից ծոցի համագործակցության խորհրդի մյուս երկրների վրա։

Հանդիպման հետաձգումից առաջ Իրանի ԱԳՆ խոսնակ Էսմայիլ Բաղային բանակցությունները ներկայացրել էր որպես կարևոր նախաձեռնություն՝ նշելով, որ դրանք «կծառայեն որպես տարածաշրջանում կայունության և անվտանգության ապահովման կարևորագույն հիմնասյուն»։

Նախատեսված երկխոսությունը տեղի էր ունենալու Իրանի և Միացյալ Նահանգների միջև Հորմուզի նեղուցի շուրջ ընթացող բաց հակամարտության պայմաններում։ Նեղուցը նավագնացության համար կարևոր, թեև նեղ ջրային ուղի է, որով նախկինում անցնում էր աշխարհի նավթի մատակարարումների շուրջ մեկ հինգերորդը։

ԱՄՆ-ի հետ պատերազմի ընթացքում Իրանը շրջափակել է նեղուցը։ Միաժամանակ, Թեհրանը բանակցություններ է վարում Մուսկատի հետ նեղուցի մյուս ափին գտնվող Օմանի տարածքային ջրերի վերաբերյալ, այդ թվում՝ ջրային ուղու նկատմամբ վերահսկողության պաշտոնականացման և տարանցման վճարներ սահմանելու հնարավորության շուրջ։ Պատերազմից առաջ նեղուցը բաց էր բոլոր երկրների նավերի ազատ անցման համար։