Օլիմպիական չեմպիոն Սամուել Սանչեսը պարգևատրել է «ՀՀ վարչապետի գավաթ» դպրոցականների սիրողական խճուղային հեծանվավազքի մրցաշարի հաղթողներին

Սևանի թերակղզի–Շողակաթ բնակավայր 40 կմ ճանապարհահատվածում այսօր անցկացվել է «ՀՀ վարչապետի գավաթ» դպրոցականների սիրողական խճուղային հեծանվավազքի մրցաշարի եզրափակիչ փուլը, որին մասնակցել են Հայաստանի 10 մարզերի և Երևանի՝ մարզային ու քաղաքային փուլերում լավագույն արդյունքներ գրանցած 22 թիմեր՝ ընդհանուր 66 մասնակցով։ Այս մասին տեղեկացնում են ԿԳՄՍՆ-ից։

Մրցաշարին հետևել և պարգևատրման արարողությանը ներկա են եղել ՀՀ կրթության, գիտության, մշակույթի և սպորտի նախարար Ժաննա Անդրեասյանը, ՀՀ Գեղարքունիքի մարզպետի տեղակալ Ջանիկ Բազեյանը, Հայաստանի հեծանվային մարզաձևերի ֆեդերացիային նախագահ Արա Սադոյանը, ինչպես նաև Օլիմպիական խաղերի չեմպիոն Սամուել Սանչեսն ու ներկայացուցիչներ RCS Sports & Events ընկերությունից: Նրանք Հայաստանում են գտնվում «Tour of Armenia» միջազգային պրոֆեսիոնալ բազմօրյա հեծանվավազքի շրջանակում:

Ողջունելով մրցաշարի մասնակիցներին՝ ՀՀ կրթույթյան, գիտության, մշակույթի և սպորտի նախարար Ժաննա Անդրեասյանը շնորհավորել է դպրոցականներին եզրափակիչ փուլին մասնակցելու և 40 կմ մրցատարածությունը հաղթահարելու կապակցությամբ։ Նախարարն ընդգծել է, որ մրցաշարի անցկացման յուրաքանչյուր հաջորդ տարում նկատելի է մասնակիցների պատրաստվածության մակարդակի աճը։ Նախարարի խոսքով՝ սպորտում հաջողությունը միշտ չէ, որ միանգամից է գրանցվում, և կարևոր է ոչ միայն հաղթանակին պատրաստ լինելը, այլև անհաջողությունից հետո չկոտրվելն ու հաջորդ հնարավորության համար շարունակել աշխատել։ ԿԳՄՍ նախարարը պարգևատրել է մրցաշարի գործընկերներին:

Պեկինի Օլիմպիական խաղերի ոսկե մեդալակիր Սամուել Սանչեսը պարգևատրել է 10-12-րդ դասարանների պայքարում մրցանակային տեղեր զբաղեցրած մասնակիցներին: Այս տարիքային խմբում երրորդ տեղը զբաղեցրել է Արագածոտնի մարզի Ագարակի Տ. Թերլեմեզյանի անվան միջնակարգ դպրոցի թիմը, երկրորդ տեղը գրավել է Գեղարքունիքի մարզի Լճաշենի Ա. Տերգ-Գրիգորյանի անվան միջնակարգ դպրոցը, իսկ հաղթողի կոչմանն արժանացել է Կոտայքի մարզի Կապուտանի միջնակարգ դպրոցի թիմը։

7-9-րդ դասարանցիների պայքարում երրորդ տեղը գրավել է Գեղարքունիքի մարզի Սևանի Մ. Մաշտոցի անվան համար 1 հիմնական դպրոցի թիմը, երկրորդ տեղը զբաղեցրել է Կոտայքի մարզի Ակունքի միջնակարգ դպրոցի թիմը, իսկ հաղթողի կոչմանն արժանացել է Արարատի մարզի Մասիսի համար 4 հիմնական դպրոցը։ Այս տարիքային խմբի մրցանակակիրներին պարգևատրել է RCS Sports & Events ընկերության գլխավոր գործառնական տնօրեն և հեծանվային սպորտի տնօրեն Լուկա Գուերչիլենան։

Երկու տարիքային խմբերում մրցանակային առաջին երեք տեղերը զբաղեցրած դպրոցների թիմերը, աշակերտներն ու ֆիզկուլտուրայի ուսուցիչները կպարգևատրվեն գավաթներով, մեդալներով, հավաստագրերով և դրամական մրցանակներով։