Քաղաքականություն
12.09.2026 | 16:00
Ֆրանսիան աջակցել է ռուս և ուզբեկ գործարար Ալիշեր Ուսմանովին Եվրամիության պատժամիջոցների ցանկից հանելուն, ուրբաթ՝ սեպտեմբերի 11-ին, հայտնել են DW-ի աղբյուրները։ Նրանց խոսքով՝ այս հարցը դարձել է այն պատճառներից մեկը, որի հետևանքով ԵՄ անդամ երկրների մշտական ներկայացուցիչները սեպտեմբերի 11-ին կրկին չեն կարողացել համաձայնության գալ՝ Ուկրաինայի տարածքային ամբողջականության խախտման պատճառով Ռուսաստանի նկատմամբ գործող սահմանափակումները երկարաձգելու շուրջ։
Ինչպես DW-ի Բրյուսելի թղթակցին հայտնել է ԵՄ դիվանագետը՝ անանունության պայմանով, երկրների միջև խորհրդակցությունները կշարունակվեն։ Դեսպանների հաջորդ հանդիպումը, ինչպես ակնկալվում է, տեղի կունենա սեպտեմբերի 14-ին՝ Ռուսաստանի նկատմամբ պատժամիջոցների գործող ռեժիմի ներկայիս ժամկետի ավարտից մեկ օր առաջ։
DW-ի՝ Բրյուսելում ունեցած աղբյուրների փոխանցմամբ՝ վեճի հիմնական առարկան շարունակում է մնալ Սլովակիայի պահանջը՝ պատժամիջոցների ցանկից հանել Ալիշեր Ուսմանովին և Միխայիլ Ֆրիդմանին։ Նրանց տեղեկություններով՝ Ուսմանովի հարցում այժմ նույն դիրքորոշումն է որդեգրել նաև Ֆրանսիան։
Հիշեցնենք՝ ԵՄ-ի կողմից Ուկրաինայի դեմ պատերազմի վարման հետ կապվող Ռուսաստանի քաղաքացիների և կազմակերպությունների նկատմամբ սահմանափակումները վերանայվում են յուրաքանչյուր վեց ամիսը մեկ։ Եվրամիությունն առաջարկել էր այդ ժամանակահատվածը երկարաձգել առնվազն մինչև մեկ տարի, սակայն Սլովակիան դեմ է նման նախաձեռնությանը։ Սլովակիայի վարչապետ Ռոբերտ Ֆիցոն, որը, ինչպես համարվում է, պրոռուսական հայացքներ ունի, նույնպես պահանջում է չեղարկել Ուսմանովի և Ֆրիդմանի նկատմամբ սահմանված պատժամիջոցները։
Ալիշեր Ուսմանովը Ուզբեկստանում ծնված ռուս միլիարդատեր է, որի բիզնեսը կապված է մետալուրգիայի, հանքարդյունաբերության, հեռահաղորդակցության և տեխնոլոգիաների ոլորտներում ներդրումների հետ։ Նրան համարում են Կրեմլին մոտ կանգնած գործարար, սակայն ինքը՝ Ուսմանովը, հերքում է դա։
Մի քանի օր առաջ մեկ այլ ռուս գործարար՝ Ռոման Աբրամովիչը, երրորդ անգամ պարտվեց ԵՄ դատարանում։ Նա փորձում էր չեղարկել իր նկատմամբ սահմանված սահմանափակումները և Եվրամիությունից փոխհատուցում ստանալ իրեն պատճառված ոչ նյութական վնասի համար։
