Փաշինյանը մեր տարածքներն է ճանաչում ապօրինի գույք, հեսա կնվիրի հարևան պետությանը. Կարապետյան․ ՏԵՍԱՆՅՈՒԹ

«Ուժեղ Հայաստան» կուսակցության ղեկավար Սամվել Կարապետյանը լրագրողների հետ զրույցում անդրադառնալով վարչապետ Նիկոլ Փաշինյանի վարած տնտեսական և արտաքին քաղաքականությանը՝ հայտարարեց, որ Փաշինյանի վարած «զիջողական գիծը» սպառնում է Հայաստանի տարածքային ամբողջականությանը։

Անդրադառնալով Տիգրանաշենի շուրջ քննարկումներին և իշխանությունների հայտարարություններին՝ Սամվել Կարապետյանը նշեց, որ Փաշինյանը սովորություն է դարձրել մարդկանց ունեցվածքն ու ընկերությունները ապօրինի գույք ճանաչելը։

«Հիմա էլ անցել է մեր տարածքներին․ մեր տարածքներն է ճանաչում ապօրինի գույք և հեսա կնվիրի հարևան պետությանը»,- հայտարարեց Կարապետյանը։

Նա ընդգծեց, որ զիջողականությանը վերջ տալու համար անհրաժեշտ է զարգացնել այն տարածքները, որոնք իշխանությունը չի կարողանում կառավարել։

Խոսելով տնտեսական վեկտորի դիվերսիֆիկացիայի և ներդրումների մասին՝ Կարապետյանը նշեց, որ գործող իշխանությունները «գենետիկորեն ընդունակ չեն տնտեսություն զարգացնելու»։

«Ութ տարվա ընթացքում ոչ մի ձեռնարկություն չի կառուցվել Հայաստանում, որ ստեղծի հավելյալ արժեք։ Պատրաստի հիմնարկ առնելը ներդրում չէ․ սեփականատիրոջ փոփոխությունից հայ մարդու կյանքում ոչինչ չի փոխվում»,- նշեց նա։

Կարապետյանը քննադատեց նաև պետական պարտքի ավելացումը՝ ընդգծելով, որ 13,9 միլիարդ դոլարի պարտքը կառավարելի չէ, եթե միայն տոկոսների վճարման համար ծախսվում է 1,4-1,5 միլիարդ դոլար, իսկ վերցրած միջոցներով հավելյալ արժեք ստեղծելու փոխարեն «անորակ ասֆալտապատում է իրականացվում»։

Արտաքին վեկտորի ընտրության՝ ԵԱՏՄ, թե՞ ԵՄ հարցում Կարապետյանը շեշտեց, որ իշխանություններն ուղղակի ձգձգում են գործընթացը՝ սեփական իշխանությունը երկարաձգելու համար։ Նա հավելեց, որ արտաքին քաղաքականության մեջ Փաշինյանը վարում է «վախկոտ քաղաքականություն»։

Մանրամասները՝ տեսանյութում։

Ռոզա Վարդանյան