04.10.2026 | 22:31
Եղիշե Մելիքյանը և Իգոչուկվու Իվուն՝ Չեռնոգորիայի հավաքականի դեմ խաղի մասին. ՏԵՍԱՆՅՈՒԹ
Բաքուն հայտարարում է, թե Ստեփանակերտում 28 հազար մարդ է բնակվում
Քաղաքականություն
11.09.2026 | 17:50
«Այսօրվա դրությամբ՝ Խանքենդիում (Ստեփանակերտ) արդեն բնակվում և աշխատում է 28 հազար մարդ»,- հայտարարել է Ադրբեջանի նախագահի՝ Ստեփանակերտում, Աղդամի և Իվանյանի շրջանների հատուկ ներկայացուցիչ Էլչին Յուսուբովը դիվանագիտական կորպուսի ներկայացուցիչների հետ նրանց Ստեփանակերտի մշակույթի կենտրոն կատարած այցի ընթացքում։
Նա նշել է, որ «նախկին տեղահանվածների վերադարձի գործընթացն ակտիվորեն շարունակվում է», գրում են ադրբեջանական լրատվամիջոցները։
«Ներկայում Ղարաբաղի համալսարանում սովորում է ավելի քան 3 հազար ուսանող։ Սա կազմում է քաղաքում բնակվողների ընդհանուր թվի ավելի քան 10 տոկոսը»,- ասել է Յուսուբովը։
Ըստ նրա՝ քաղաքում կառուցվում են նոր բնակելի շենքեր և այգիներ, անցկացվում են ժամանակակից պահանջներին համապատասխանող ճանապարհներ։ Իր խոսքում Յուսուբովը փաստել է, որ հայերին պատկանող գույքը վերացվում է, շինությունները՝ քանդվում։
«Միևնույն ժամանակ, արագացել է քաղաքի տեսքին և ժամանակակից քաղաքաշինական չափանիշներին չհամապատասխանող անճաշակ կառույցների քանդման գործընթացը։ Դրան զուգահեռ՝ սկսվել են նոր պահանջներին համապատասխանող ժամանակակից շենքերի նախագծման և կառուցման աշխատանքները»,- հավելել է նա։
Նշենք, որ Արցախի հայաթափումից ու էթնիկ զտումից հետո Բաքուն Ստեփանակերտում ապօրինաբար քանդում է հայերին պատկանող տներն ու շինությունները։
Ադրբեջանի նախագահի օգնական Հիքմեթ Հաջիևը, իր հերթին, հայտարարել է, թե ավելի քան 40 հազար տեղահանվածներ արդեն վերադարձել են Ղարաբաղ։ Նա նշել է, թե 2020 թվականից ի վեր Ղարաբաղում վերականգնվել է ավելի քան 45 տարբեր բնակավայր, ներկայում տարածաշրջանում բնակվում է շուրջ 100 հազար մարդ։
«Մենք զրոյից չենք սկսել․ մենք սկսել ենք մինուս հինգից։ Այս տարածքները դեռևս տուժում են ականային աղտոտվածությունից։ Եվ սա մեր առջև ծառացած հսկայական մարտահրավեր է»,- հայտարարել է Հաջիևը։
Թարգմանությունը՝ Էմմա Չոբանյանի
