Իմ սիրելի գործընկերը օլիգարխ դառնալու հավակնություն ուներ. Փաշինյանը` Հայկ Սարգսյանի մասին․ ՏԵՍԱՆՅՈւԹ

ՔՊ-ում հարաբերությունները Հայկ Սարգսյանի հետ չեն լարվել նրա կողմից ՔՊ վարչությունում հնչեցրած ինքնաքննադատության պատճառով, այլ նրա հետ կապված բացահայտումների հետևանքով։ Այս մասին Factor TV-ի հարցին ի պատասխան հայտարարեց վարչապետ Նիկոլ Փաշինյանը` անդրադառնալով ՔՊ-ական նախկին պատգամավորի վերջին հարցազրույցին։

Հայկ Սարգսյանը հարցազրույցում պատմել էր, որ ՔՊ վարչության անդամ եղած ժամանակ կուսակցության ներսում ինքնաքննադատությամբ ելույթ է ունեցել՝ բարձրացնելով, մասնավորապես, Տավուշի մարզում ապօրինի ծառահատումների թեման։ Նրա խոսքով՝ դրանից հետո իր հարաբերությունները կուսակիցների հետ լարվել են, իսկ ՔՊ-ում ինքնաքննադատության ինստիտուտն այլևս չի գործում։

Փաշինյանն այս պնդումներին այսպես պատասխանեց։

«Նախ՝ Հայկ Սարգսյանի հայտարարությունների առիթով քրեական գործ է հարուցված, և ես կարծում եմ, որ մեր իրավապահ համակարգում լավ կլինի, որ կուլտուրա լինի, և Հայաստանում այդպիսի հայտարարությունների արդյունքում ինչ-որ մեկը հայտնվի բանտում, ո՞վ, ով որ մեղավոր է»,- ասաց վարչապետը։

Փաշինյանը նշեց, որ Հայկ Սարգսյանին ճանաչում է դեռ մանկուց, սակայն նրա ներկայիս դիրքորոշումն անվանեց «անազնիվ»։

«Այդ դիրքավորումը քաղաքականության մեջ իմ տեսած ամենաանազնիվ դրսևորումներից մեկն է։ ՔՊ-ում նրա հետ հարաբերությունները չեն լարվել դրա պատճառով, այլ լարվել են նրա պատճառով, որ իր հետ կապված եղել են բացահայտումներ»,- ասաց նա։

Վարչապետի խոսքով՝ խնդիրներ են առաջացել նաև ավազի հանքերի ապօրինի շահագործման, ինչպես նաև Սարգսյանի օգնականի կողմից ապօրինի պետհամարանիշներով և առանց վարորդական իրավունքի մեքենա վարելու դեպքերի պատճառով։

«Երբ որ ավազի հանքերի ապօրինի շահագործման թեմա է բարձրացվել, պարզվել է, որ կա՛մ ինքը, կա՛մ իր հետ փոխկապակցված անձինք ներգրավված են այդպիսի գործունեության մեջ»,- հայտարարեց Փաշինյանը։

Նա նաև անդրադարձավ կազինոների թեմային՝ ընդգծելով, որ ոլորտի կարգավորման օրակարգն ինքն է առաջ բերել։

«Կազինոների հետ կապված օրակարգը իմ օրակարգն է, ես եմ այդ օրակարգը բերել Հայաստանի Հանրապետություն, և 2018 թվականից մինչև այսօր մենք հետևողական քայլեր ենք իրականացնում»,- ասաց Փաշինյանը՝ նշելով, որ 2027 թվականի հունվարի 1-ից գործելու է համապատասխան օպերատոր։

Վարչապետը պնդեց, որ հակասությունների հիմնական պատճառներից մեկն էլ Հայկ Սարգսյանի՝ օլիգարխ դառնալու հավակնություններն են եղել։

«Լարվածությունը առաջացել է այն պատճառով, որ իմ սիրելի գործընկերը հենց 2018-ից օլիգարխ դառնալու հավակնություններ է ցուցաբերել, և ես թույլ չեմ տվել այդ հավակնությունների զարգացումը»,- ասաց նա։

Փաշինյանը նաև պնդեց, որ Սարգսյանի կողմից բնապահպանական ոլորտում բարձրացված հարցերի ֆոնին հենց նա է ապօրինի գործունեություն ծավալել Սևանի ափին։

«Այդ հայտարարությունն անողը ինքն է Սևանի ափին ապօրինի գործունեություն ծավալել՝ իմ անունը շահարկելով և իշխանության մեջ լինելով»,- ասաց Փաշինյանը։

Անդրադառնալով ՔՊ-ում ինքնաքննադատության ինստիտուտի դադարեցման մասին Սարգսյանի պնդմանը՝ Փաշինյանը նշեց, որ կուսակցության աշխատանքային ֆորմատները փոխվել են նախընտրական գործընթացով պայմանավորված։

«Անցած տարվա նոյեմբերից «Քաղաքացիական պայմանագիր» կուսակցության ամբողջ աշխատակարգը փոխվել է, որովհետև առջևում խորհրդարանական ընտրություններ էին։ Նոյեմբերից՝ նոր վարչություն ընտրվելուց հետո, մենք ամբողջությամբ գործել ենք նախընտրական տրամաբանությամբ»,- ասաց նա։

Փաշինյանի խոսքով՝ տևական ժամանակ է՝ ՔՊ նախաձեռնող խմբի նիստեր չեն անցկացվել՝ նախընտրական գործընթացների, ԱԺ-ի երկարատև նիստերի և ընտրությունների արդյունքների վերլուծության անհրաժեշտության պատճառով։

«Դա ծայրահեղ անազնիվ հայտարարություն է։ Եվ դա կապված է նրա հետ, որ կան քրեական գործեր, այդ թվում՝ ավազի ապօրինի արդյունահանման դեպքերի վերաբերյալ»,- հայտարարեց վարչապետը։

Փաշինյանը հիշեցրեց նաև, որ Հայկ Սարգսյանին կուսակցության վարչության նիստում խիստ նկատողություն է հայտարարվել և նա նախընտրական ցուցակում չի ընդգրկվել։

Վարչապետը պնդեց նաև, որ Սարգսյանի օգնականի վերաբերյալ գործով դատարանի վճիռն արդեն օրինական ուժի մեջ է մտել։

«Դատարանի վճիռը մտել է օրինական ուժի մեջ, առաջին ատյանից հետո չի բողոքարկվել»,- ասաց Փաշինյանը։

Փաշինյանից հետաքրքրվեցինք նաև Սյունիքի նախկին մարզպետ Սուրիկ Խաչատրյանին Հայաստանի իրավապահներին արտահանձնելու Ֆրանսիայի մերժման մասին։

«Ֆրանսիայի կառավարությունը հասկացել է, որ Սուրիկ Խաչատրյանը քաղաքական հետապնդումների զոհ է, դրա համար էլ չի արտահանձնում Հայաստանի բռնապետական իշխանությանը»,- հեգնեց Փաշինյանը։

Մանրամասները՝ տեսանյութում։

Արփի Հակոբյան