11.10.2026 | 10:11
Շանհայ. Կարեն Խաչանովը դուրս եկավ 1/8 եզրափակիչ
Լիտվան ՌԴ միջուկային զենքի նշանառության տակ կհայտնվի, եթե իր տարածքում միջուկային զինանոց տեղակայի․ Պեսկով
Քաղաքականություն
11.09.2026 | 14:34
Ռուսաստանի միջուկային զենքը կուղղվի դեպի Լիտվա, եթե այդ երկրի իշխանությունները միջուկային զինանոցներ տեղակայեն իրենց տարածքում։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, գրում է Meduza-ն։
«Ակնհայտ է, որ այդ զենքն ուղղված կլինի ոչ թե Արևմուտքին, այլ Արևելքին, այսինքն՝ մեզ։ Եվ եթե տարածքում լինի միջուկային զենք, որն ուղղված է մեր դեմ, համապատասխանաբար, այդ երկրի տարածքը նույնպես կհայտնվի մեր միջուկային զենքի նշանառության տակ։ Դա կլինի շատ լուրջ շրջադարձ սրման և լարվածության առումով»,- Պեսկովի խոսքերն է մեջբերում «Ինտերֆաքս»-ը։
Լիտվայի իշխանություններն այս տարվա հունիսին հաստատել էին, որ բանակցություններ են վարում երկրի տարածքում միջուկային զենքի տեղակայման շուրջ։ Financial Times-ը գրել էր, որ խոսքը միջուկային մարտագլխիկներ կրելու ունակ ամերիկյան ռմբակոծիչների մասին է։ Լիտվայի գործող Սահմանադրությունն արգելում է երկրում զանգվածային ոչնչացման զենքի կամ օտարերկրյա ռազմակայանների տեղակայումը։ Լիտվայի իշխանությունները հայտնել են, որ պատրաստ են քննարկել Սահմանադրության փոփոխությունները՝ այդ արգելքը վերացնելու համար։
Ռուսաստանի և ՆԱՏՕ-ի միջև 1997 թվականին կնքված համաձայնագրում ամրագրված է, որ Հյուսիսատլանտյան դաշինքը «նոր անդամների տարածքում միջուկային զենք տեղակայելու մտադրություն, ծրագիր կամ պատճառ» չունի։ Ռուսաստանի՝ Ուկրաինայի դեմ լայնածավալ պատերազմը սկսելուց հետո Մոսկվան իր մարտավարական միջուկային զենքը տեղակայել է Բելառուսում։
Թարգմանությունը՝ Էմմա Չոբանյանի
