11.09.2026 | 14:05
Նյու Յորքում սեպտեմբերի 11-ի հարձակումների 25-րդ տարելիցի հիշատակի միջոցառումներ կանցկացվեն
Կանադան և Ուկրաինան հարյուրամյա գործընկերության մասին համաձայնագիր են ստորագրել․ Օտտավան Կիևին 254 մլն դոլար կհատկացնի ՀՕՊ-ի ամրապնդման համար
Քաղաքականություն
11.09.2026 | 12:02
Ուկրաինայի նախագահ Վլադիմիր Զելենսկին և Կանադայի վարչապետ Մարկ Քարնին «Հարյուրամյակի գործընկերության» մասին հռչակագիր են ստորագրել, որը պետք է «երկու երկրների հարաբերությունները բարձրացնի համապարփակ ռազմավարական գործընկերության մակարդակի»։ Այս մասին հայտնել է Կանադայի կառավարության մամուլի ծառայությունը, փոխանցում է The Insider-ը։
Բացի այդ, Կանադան հայտարարել է Ուկրաինայի հակաօդային պաշտպանության ամրապնդման համար 350 մլն կանադական դոլար (շուրջ 254 մլն ԱՄՆ դոլար) հատկացնելու մասին։ Քարնին նաև խոստացել է, որ առաջիկա երկու տարիներին երկիրը կարտադրի «միլիոնավոր անօդաչու թռչող սարքեր», որոնց մեկ երրորդը կուղարկվի Ուկրաինա։
Զելենսկին և Քարնին «Հարյուրամյակի գործընկերության հռչակագիրը» ստորագրել են Կալգարիում, ուր Ուկրաինայի առաջնորդը ժամանել է կանադացի գործընկերոջ հրավերով։ Համաձայնագրի շրջանակում Կանադան պարտավորվել է շարունակել բավարարել Ուկրաինայի «անհետաձգելի ռազմական կարիքները»։ Բացի այդ, կողմերը պաշտոնապես երկարաձգել են Կանադայի INIFIER ուսումնական առաքելությունն ուկրաինական զորքերի համար մինչև 2029 թվականը։
Քարնին նաև հայտարարել է Ուկրաինային 350 մլն կանադական դոլար հատկացնելու մասին՝ հակաօդային պաշտպանության համար որսացող հրթիռներ ձեռք բերելու նպատակով։ Նրա խոսքով՝ հրթիռների մատակարարումները կիրականացվեն ամերիկյան Jump Start մեխանիզմի միջոցով, որը դաշնակիցներին հնարավորություն է տալիս ԱՄՆ-ից Ուկրաինայի համար սպառազինություն պատվիրել։ Կանադան նաև Ուկրաինային կտրամադրի ավելի քան 430 մլն կանադական դոլարի (շուրջ 310 մլն ԱՄՆ դոլար) վարկային երաշխիքներ՝ գազի ձեռքբերումը ֆինանսավորելու համար։
Քարնին առանձին անդրադարձել է անօդաչու թռչող սարքերին։ Նրա խոսքով՝ Կանադան կստեղծի «անօդաչու սարքերի ազգային շուկա», որը երկրի զինված ուժերին ուղղակի հասանելիություն կտա շուրջ 400 մատակարարների, ինչպես նաև կավելացնի անօդաչուների արտադրության ծավալները։ Նրա կարծիքով՝ այս հարցում Կանադային կօգնի Ուկրաինայի փորձը։ Նա հավաստիացրել է, որ առաջիկա երկու տարիներին Կանադան կարտադրի «միլիոնավոր անօդաչու սարքեր»։
«Եվ, ինչը ոչ պակաս կարևոր է, մեր արտադրած բոլոր անօդաչու թռչող սարքերի մեկ երրորդը կուղղվի Ուկրաինային աջակցելու համար»,- շեշտել է Քարնին։
Կանադական CBC-ի հաղորդմամբ՝ Կանադայի բանակն այս պահին ունի տարբեր տեսակի ընդամենը 2000 անօդաչու թռչող սարք։
Զելենսկին պարզաբանել է, որ Կանադան և Ուկրաինան ստորագրել են համաձայնագրի միայն առաջին մասը, որը կոչվում է «Drone Deal»։ Նա նշել է, որ համաձայնագրի վերջնական հաստատումը կարող է տեղի ունենալ Նյու Յորքում կայանալիք ՄԱԿ-ի Գլխավոր վեհաժողովի շրջանակում, որը կմեկնարկի սեպտեմբերի վերջին։
Թարգմանությունը՝ Էմմա Չոբանյանի
