10.09.2026 | 21:58
Սանկտ Պետերբուրգում Ադրբեջանի նախկին գլխավոր հյուպատոսը մեղադրվում է ոսկու մաքսանենգության մեջ
Apple-ը ներկայացրել է iPhone 18 Pro և Pro Max մոդելները, ինչպես նաև իր առաջին «ծալվող» սմարթֆոնը
Հաղորդաշարեր
10.09.2026 | 20:30
Ամերիկյան Քալիֆորնիայի նահանգի Կուպերտինո քաղաքում գտնվող Սթիվ Ջոբսի անվան թատրոնում սեպտեմբերի 8-ին տեղի է ունեցել Apple-ի նոր գաջեթների շնորհանդեսը՝ «Զարմացրու և փայլիր» («Surprise and shine») կարգախոսի ներքո, գրում է Meduza-ն։
Շնորհանդեսը Apple-ի նոր գլխավոր գործադիր տնօրեն Ջոն Թերնուսի համար ընկերության ղեկավարի պաշտոնում առաջին խոշոր միջոցառումն էր։ Սեպտեմբերի 1-ից նա այդ պաշտոնում փոխարինել է Թիմ Քուքին։
Գլխավոր նորույթը ընկերության պատմության մեջ առաջին ծալվող հեռախոսն է՝ iPhone Duo-ն, որը պատրաստված է տիտանից։ Այն կարելի է օգտագործել ոչ միայն ամբողջությամբ բացված, այլև մասնակի ծալված վիճակում։ Օրինակ՝ դրա մի կեսը կարելի է օգտագործել որպես հենակ։ «Ծալվող» մոդելը հասանելի կլինի երկու գույնով՝ մուգ կապույտ և արծաթագույն։
Duo-ի ներքին էկրանը՝ ամբողջությամբ բացված վիճակում, 7,6 մատնաչափ է, իսկ արտաքին էկրանը՝ ծալված վիճակում, 5,4 մատնաչափ։ iOS օպերացիոն համակարգը նույնպես հատուկ հարմարեցվել է նոր ձևաչափին՝ հաշվի առնելով բազմաառաջադրանքային աշխատանքը և մեծ էկրանի օգտագործման առանձնահատկությունները։ Այսպես, ներքին էկրանը կարելի է օգտագործել որպես մեկ մեծ էկրան կամ դրա վրա միաժամանակ բացել երկու հավելված։ Duo-ն ունի Touch ID (մատնահետքի նույնականացում), բայց ոչ Face ID (դեմքի ճանաչում): Սմարթֆոնն ունի կրկնակի 48 մեգապիքսելանոց հիմնական տեսախցիկ:
Apple-ի առաջին ծալովի հեռախոսի վաճառքը կսկսվի հոկտեմբերի 23-ին՝ սկսած 1999 դոլարից՝ 256 ԳԲ մոդելի համար: Նախնական պատվերները կբացվեն թողարկումից մեկ շաբաթ առաջ:
Շնորհանդեսի ընթացքում ներկայացվել են նաև հիմնական ֆլագմանային շարքի նոր սմարթֆոնները՝ iPhone 18 Pro և Pro Max։ Դրանք հասանելի կլինեն չորս գույով․ արծաթագույնից և սևից բացի՝ կհայտնվեն նաև նոր՝ կապույտն ու մուգ բալագույնը։
Արտաքին տեսքով նոր սմարթֆոնները նման են նախորդ մոդելներին։ Նորերում տեղադրված է A20 Pro պրոցեսորը, որն Apple-ն անվանել է արդյունաբերության ամենահզոր բջջային չիպը։ iPhone 18 Pro և Pro Max մոդելներն ունեն նաև պրոցեսորի բարելավված հովացման համակարգ, ինչի շնորհիվ սմարթֆոնը պետք է ավելի քիչ տաքանա։ Բացի այդ, ընկերությունը խոստանում է, որ նոր՝ iPhone 18 Pro-ի մարտկոցը մեկ լիցքավորմամբ կաշխատի մինչև 24 ժամ, իսկ Pro Max-ինը՝ մինչև 30 ժամ։
Նոր սմարթֆոնների շնորհանդեսի ընթացքում ընկերությունը ներկայացրել է նաև Siri AI-ի նոր հնարավորությունները։ Այժմ այն կարող է տարբեր գործողություններ կատարել տարբեր հավելվածներում։ Ընդհանուր առմամբ, Siri AI-ն աջակցում է ավելի քան 250 հավելվածի, այդ թվում՝ երրորդ կողմի մշակողների կողմից ստեղծված հավելվածների։ Ձայնային օգնականի վերամշակված տարբերակը հասանելի է 16 լեզվով, որոնց թվում ռուսերենը չկա։
iPhone 18 Pro-ի գինը սկսվում է 1199 դոլարից՝ 256 ԳԲ հիշողությամբ մոդելի համար, իսկ iPhone 18 Pro Max-ինը՝ 1299 դոլարից։ Վաճառքը կմեկնարկի սեպտեմբերի 18-ին։
Շնորհանդեսի ժամանակ Apple-ը ներկայացրել է նաևAirPods 5 ականջակալներ՝ նոր ակուստիկ համակարգով և բարելավված ակտիվ աղմուկի նվազեցմամբ, գինը՝ սկսած 129 դոլարից, ինչպես նաև Apple Watch Series 12 և Apple Watch Ultra 4 ժամացույցներ՝ նորացված սենսորով։ Apple Watch Series 12-ի գինը՝ 399 դոլար է, իսկ Apple Watch Ultra 4-ինը՝ 799 դոլար։
Թարգմանությունը՝ Էմմա Չոբանյանի
