05.11.2026 | 16:21
Բրազիլիայում կարմիր քարտերի համաշխարհային ռեկորդ է գրանցվել. ՏԵՍԱՆՅՈՒԹ
Ուկրաինան հարձակվել է Մախաչկալայի նավահանգստի վրա․ ԱԹՍ-ներից մեկը հարվածել է թատրոնի շենքին․ ՏԵՍԱՆՅՈՒԹ
Քաղաքականություն
10.09.2026 | 12:17
Ուկրաինայի զինված ուժերն անօդաչու թռչող սարքերով հարվածել են Դաղստանին։ Հանրապետության ղեկավարի պաշտոնակատար Ֆյոդոր Շչուկինը հայտնել է, որ ԱԹՍ-ի բեկորների ընկնելու հետևանքով հրդեհ է բռնկվել Մախաչկալայի միջազգային ծովային առևտրային նավահանգստում, գրում է Meduza-ն։
ԱԹՍ-ն նաև հարվածել է Գամզաթ Ցադասայի անվան Ավարական երաժշտական-դրամատիկական թատրոնի շենքին։ Թատրոնի տնօրեն Մագոմեդ Բիսավալիևը հայտնել է, որ անօդաչուն ընկել է շենքի տանիքին։ Պայթյունի հետևանքով պատուհանները կոտրվել են, հրդեհ է բռնկվել։
Ֆյոդոր Շչուկինի խոսքով՝ այս պահին բոլոր հրդեհները մարվել են։ Հարձակման հետևանքով զոհեր և տուժածներ չկան։
Ուկրաինական անօդաչուները հարձակվել են նաև Վորոնեժի մարզի վրա, հայտնել է նահանգապետ Ալեքսանդր Գուսևը։ Նրա տեղեկացմամբ՝ անօդաչուներից մեկը հարվածել է Բորիսոգլեբսկում գտնվող մասնավոր տանը։ Մեկ կին զոհվել է, ևս երկու մարդ տուժել է։
Ռուսաստանի Պաշտպանության նախարարությունը հայտարարել է, որ ՀՕՊ ուժերը Աստրախանի, Բելգորոդի, Բրյանսկի, Վոլգոգրադի, Վորոնեժի, Կալուգայի, Կուրսկի, Օրյոլի, Ռոստովի, Տուլայի մարզերի, Դաղստանի, Կալմիկիայի, բռնակցված Ղրիմի, Կրասնոդարի երկրամասի, ինչպես նաև Կասպից ու Սև ծովերի ջրերի վրա որսացել և ոչնչացրել են ուկրաինական 448 անօդաչու թռչող սարք։
Թարգմանությունը՝ Էմմա Չոբանյանի
