Սերբիայում արտահերթ խորհրդարանական ընտրություններ կանցկացվեն

Սերբիայի նախագահ Ալեքսանդր Վուչիչը հայտարարել է, որ սեպտեմբերի 9-ին  կհայտարարի Ազգային սկուպշինայի (միապալատ խորհրդարանի) լուծարման մասին և կնշանակի արտահերթ ընտրություններ: Վուչիչը նաև հաստատել է, որ քվեարկությունը տեղի կունենա հոկտեմբերի 25-ին, գրում է DW-ի ռուսական ծառայությունը։

«Ես պետք է երկու որոշում կայացնեմ՝ համաձայն Սահմանադրության և նախագահի մասին օրենքի», – ասել է քաղաքական գործիչը RTS-ի եթերում՝ հավելելով, որ ընտրարշավը կտևի 46 օր։ Իշխող Սերբական առաջադիմական կուսակցության (SNS) գլխավոր կոմիտեն արդեն նշել է, որ Վուչիչը կգլխավորի «Միացյալ Սերբիա»-ի ցուցակը և որ նա կլինի վարչապետի թեկնածուն, եթե ցուցակը հաղթի։

Հունիսի վերջին Սերբիայի նախագահը հայտարարել էր մոտ ապագայում պաշտոնը վաղաժամ թողնելու իր ծրագրերի մասին։ Վուչիչը իշխանության է արդեն 12 տարի, նրա երկրորդ նախագահական ժամկետը լրանում է 2027 թվականի կեսերին։ Սերբիայի սահմանադրության համաձայն՝ նույն անձը չի կարող պետության ղեկավարի պաշտոնում լինել երկու ժամկետից ավելի։

Վուչիչը նաև մեկնաբանել է ռազմական հանցագործ և բոսնիացի սերբերի գեներալ Ռատկո Մլադիչի հուղարկավորության անցկացման հետ կապված եվրոպական գործընկերների կոշտ արձագանքները։ «Մենք բոլորս սպասում էինք դրան», – ասել է Ալեքսանդր Վուչիչը ու հավելել․ «Այս հուղարկավորությունը տարածաշրջանում շատերի համար պատրվակ ծառայեց ցույց տալու, թե որքան են նրանք ատում Սերբիային և որքան են արհամարհում նրա հաջողությունները»։

«Բոսնիացի մսագործի» հրաժեշտի արարողությանը մասնակցել են ավելի քան 300 ուղղափառ հոգևորականներ, Մլադիչի ընտանիքի անդամները, ինչպես նաև Սերբիայի կառավարության բազմաթիվ անդամներ։ KNA գործակալության տվյալներով՝ լրագրողները հավաքվածների թվում նկատել են նաև նախագահի որդուն՝ Դանիլո Վուչիչին։

Միևնույն ժամանակ, ԵՄ ընդլայնման հարցերով հանձնակատար Մարթա Կոսը չեղարկել է շաբաթվա վերջին նախատեսված այցը Բելգրադ: «Մլադիչի մեծարումը անհամատեղելի է այն արժեքների հետ, որոնք հիմք են հանդիսանում դեպի Եվրամիություն տանող ճանապարհին», – հայտարարել է նա։ Սերբիայի հարևան երկրները նույնպես արտահայտել են իրենց վրդովմունքը Մլադիչի մեծարման կապակցությամբ։

Թարգմանությունը՝ Էմմա Չոբանյանի