Ցինիկ հարցադրումներ է կատարում, որևէ հարցի չեմ պատասխանելու․ Մանավազյանը՝ Էդգար Ղազարյանին․ ՏԵՍԱՆՅՈւԹ

Ազգային ժողովի ֆինանսավարկային և բյուջետային հարցերի մշտական հանձնաժողովի նիստերի ժամանակ տեղի է ունեցել սուր բանավեճ ՔՊ խմբակցության նախագահ Արուսյակ Մանավազյանի և Էդգար Ղազարյանի միջև։

Քննարկման ընթացքում Էդգար Ղազարյանը հարցով դիմել է զեկուցողին՝ նշելով, որ տվյալ խմբակցության պատգամավորները հաճախ են հիշատակում տարբեր պատգամավորների կամ նրանց ծնողների՝ մինչև 2018 թվականը զբաղեցրած պաշտոնները՝ դա ներկայացնելով որպես բացասական երևույթ։ Որպես օրինակ՝ նա վկայակոչել է պատգամավոր Ծովինար Վարդանյանի հորը, ով 1993 թվականին զբաղեցրել է ՀՀ պետնախարարի, 1995-1998 թվականներին՝ պաշտպանության նախարարի տեղակալի, իսկ 1998-2000 թվականներին՝ բնապահպանության նախարարի պաշտոնները։ Ղազարյանը հետաքրքրվել է, թե արդյոք այդ հանգամանքները խմբակցության ընդհանուր արժեհամակարգային տեսանկյունից կոնֆլիկտ չեն առաջացնում տվյալ թեկնածուի առաջադրման իմաստով։

Մանավազյաը դիմել է նիստը նախագահողին և խմբակցության ղեկավարությանը՝ անդրադառնալով Էդգար Ղազարյանի գործողություններին։ Նա հայտարարել է, որ Ղազարյանը թիրախավորում է Ազգային ժողովի կին պատգամավորներին, իր էջում տեղադրում է նրանց լուսանկարները, կատարում ցինիկ գրառումներ և հանձնաժողովի նիստերին հնչեցնում ցինիկ հարցադրումներ։ Նա հրաժարվել է պատասխանել Ղազարյանի որևէ հարցի՝ նշելով․ «Խնդրում եմ, ես չեմ պատասխանելու որևէ հարցի, և սա համարում եմ ձեր խմբակցության որոշումը․․․ որ դուք հարցի իրավունք եք թույլ տալիս այս անձնավորությանը»։

Նիստը նախագահողը պարզաբանել է, որ ցանկացած պատգամավոր իրավունք ունի ներկա գտնվել հանձնաժողովի նիստերին և հարցեր բարձրացնել։ Նա ընդգծել է, որ հարցին չպատասխանելը զեկուցողի իրավունքն է, սակայն պատգամավորի մասնակցությունը սահմանափակելն այնքան էլ ճիշտ չէ։

Մանրամասները՝ տեսանյութում։

Եվգենյա Համբարձումյան