01.11.2026 | 21:56
Լրագրողներն այցելել են բանակային դիրք ու ամրացված շրջան, հանդիպել Սուրեն Պապիկյանի հետ
Թասիբ էր. գործընկերոջս հարվածում էին, պատկերացրի` կարող է սպանեն. Տեր-Եսայանը` ծեծկռտուքի մասին․ ՏԵՍԱՆՅՈՒԹ
Հասարակություն
08.09.2026 | 14:08
Երևանի քաղաքապետարանում տեղի ունեցած աղմկահարույց ծեծկռտուքի գործով տուժող ճանաչված, ավագանու «Մայր Հայաստան» խմբակցության անդամ Սարգիս Տեր-Եսայանը այսօր լրագրողների հետ ճեպազրույցում մանրամասներ է հայտնել միջադեպից, քրեական վարույթի ընթացքից և անդրադարձել մայրաքաղաքի կառավարման ճգնաժամին։
Անդրադառնալով հարցին, թե ինչու որոշեց միջամտել բախմանը, Տեր-Եսայանը նշեց, որ դա իր «թասիբն ու բնավորությունն էր»։
«Տեսա՝ իմ աչքի առջև գործընկերոջս հարվածում են, մնացել է մենակ ու անպաշտպան։ Մոտ 20 հոգով շրջապատել էին ու սկսել էին հարվածել գլխին, դեմքին։ Մի պահ պատկերացրի, որ կարող է ծեծելով սպանեն այնտեղ։ Ես չկարողացա դա հանդուրժել, որովհետև միշտ թույլի ու ճշտի կողքին եմ եղել։ Գնացի իրեն պաշտպանելու, և սկսեցին ինձ հարվածել»,- պատմեց ավագանու անդամը։
Նա տեղեկացրեց, որ անցել է դատաբժշկական փորձաքննություն, և քթի հատվածում ունի կոտրվածք։ Գործը գտնվում է նախաքննության փուլում, մեղադրյալներ դեռ չկան, առերեսումներ չեն եղել։ Ընդդիմադիր գործիչը մտավախություն հայտնեց, որ իշխանությունները կփորձեն «ծածկադմբոց անել» գործը։
Խոսելով Երևանի երթևեկության վիճակի և մարզային տաքսիների մուտքը քաղաք արգելելու քաղաքապետարանի նախաձեռնության մասին՝ Տեր-Եսայանը շեշտեց, որ դա խնդիրը չի լուծի։
«Այդ մեքենաները միայն Կենտրոն չեն գալիս, այլ գնում են տարբեր վարչական շրջաններ։ Խնդրի բուն լուծումը պետք է լինի այլ կերպ․ ամբողջ կառավարման օղակները՝ նախարարությունները, Դատախազությունը, Կառավարության շենքերը պետք է դուրս բերել Կենտրոնից, ինչպես արվել է, օրինակ, Վրաստանում, կամ ինչպես գործում է եվրոպական մի շարք երկրներում։ Ամբողջ պետական ապարատն առավոտյան գալիս է Կենտրոն, երեկոյան՝ գնում, իսկ քաղաքը մնում է փոշու, կեղտի ու խցանումների մեջ»,- ասաց ավագանու ընդդիմադիր անդամը։
Մանրամասները՝ տեսանյութում։
