Լեռնային Ղարաբաղում աշխատող ադրբեջանցի կապալառուին «սպառնում են ձերբակալությամբ»՝ աշխատանքի վճարը պահանջելու համար

Լեռնային Ղարաբաղում վերակառուցման աշխատանքներ իրականացնող ադրբեջանցի կապալառուն պնդում է, որ իրեն սպառնացել են ձերբակալությամբ՝ տեսանյութ հրապարակելուց հետո, որում նա բողոքում է աշխատանքի համար չվճարվելուց։  Այս մասին ասվում է  OC Media-ի անդրադարձում։

Ադրբեջանը մոտ 22 միլիարդ մանաթ  (13 միլիարդ դոլար) է հատկացրել Լեռնային Ղարաբաղի և հարակից տարածքների վերականգնման և վերակառուցման համար՝ 2020 թվականին Լեռնային Ղարաբաղի երկրորդ պատերազմի ավարտից ի վեր։

Ըստ լրատվամիջոցի՝ Կապալառու Նասիմի Հաթամովը և նրա «NIHAT 2024 LLC» ընկերությունը Խոջալուի շրջանի Դաշբուլաղ գյուղում (Աստղաշեն) աշխատանքներ են իրականացնում «Paramount Construction LLC»-ի ենթակապալառուի ներքո։ Անկախ Meydan TV-ի և Հաթամովի տվյալներով՝ իշխանությունները ընկերության հետ 3,4 միլիոն մանաթի (2 միլիոն դոլարի) պայմանագիր են կնքել՝ տարածաշրջանում աշխատանքներ իրականացնելու համար։

Հաթամովը «Paramount Construction LLC»-ին մեղադրել է իր ընկերության կատարած աշխատանքի դիմաց վճարումները չկատարելու մեջ։

Հաղորդվում է, որ Խոջալուում գտնվելու ժամանակ Հաթամովն ասել է, որ վճարման խնդրի վերաբերյալ զանգահարել է ոստիկանություն, սակայն, նրա խոսքով, ոստիկանությունը չի միջամտել։ Ավելի ուշ նա տեսաուղերձ է ձայնագրել և հրապարակել սոցիալական ցանցերում։

Հետագայում Հաթամովը հայտնել է, որ իրեն խոստացել են վճարել, եթե ինքը հեռացնի տեսանյութը։

Անկախ Meydan TV-ին տված մեկնաբանությունում Հաթամովն ասել է, որ իրեն զանգահարել է Բաքվում գործող «Tutto Bella» ընկերության ղեկավար Անար Մամեդովը և խնդրել հեռացնել տեսանյութը։ Ընկերությունը զբաղվում է շինարարությամբ, վերանորոգմամբ, կանաչապատմամբ և շինանյութերի արտադրությամբ։

Հաթամովն ասել է, որ ներկայացուցչությունում աշխատում է Թելման Քերիմլի անունով ներկայացուցիչ, որը զանգահարել է Անար Մամեդովին և խնդրել, որ տեսանյութը հեռացվի։

Նրա խոսքով՝ երեք շաբաթ սպասելուց հետո ինքը զանգահարել է Մամեդովին, որը հրաժարվել է իր խոստումից և հայտնել, որ իրեն վճարելը իր պարտականությունը չէ։ Հաթամովը նշել է, որ ավելի ուշ իրեն հրավիրել են Ստեփանակերտում գտնվող Ադրբեջանի նախագահի ԼՂ-ում հատուկ ներկայացուցչի գրասենյակ, որտեղ պաշտոնյան ասել է, որ մեկ շաբաթվա ընթացքում իրեն կվճարեն։ Այնուհետև նրան կրկին հրավիրել են գրասենյակ, որտեղ նա հանդիպել է մեկ այլ պաշտոնյայի։ Սակայն, Հաթամովի խոսքով, իրեն հասանելիք գումարը չի վճարվել, իսկ գրասենյակից դադարել են պատասխանել նրա զանգերին։

Տեսանյութը հրապարակելուց հետո Հաթամովը պատմել է, որ ոստիկանությունից զանգ է ստացել, որով պահանջել են ջնջել տեսանյութը։ Նա նաև պնդել է, որ ներկայացուցչությունից զանգ է ստացել և ասել են, որ եթե չջնջի տեսանյութը, կձերբակալվի և կարտաքսվի՝ չնայած այն հանգամանքին, որ ինքը Ադրբեջանի քաղաքացի է։

Հաթամովը նշում է, որ իրեն գումար է պետք իր աշխատակիցներին վճարելու համար՝ հավելելով, որ հարկային մարմիններին պարտքերը նույնպես ֆինանսական ծանրաբեռնվածություն են ստեղծել իր համար։

Նրա խոսքով՝ նախագծում աշխատել է 28 մարդ։ Նա նաև հայտնել է, որ պարտքերի պատճառով պարտատերերն իր ավտոմեքենան են վերցրել։ Հարկային պարտքերը կազմել են 17-18 հազար մանաթ (մոտ 10-11 հազար դոլար)։ Հաթամովը հայտարարել է, որ ոչ մի հանգամանքներում մտադիր չէ հեռացնել տեսանյութը։

Թարգմանությունը՝ Էմմա Չոբանյանի